असार ३२ जुम्ला ।
अनुदानमा आश्रित भएर सञ्चालनमा आएका जुम्लाका धेरै उद्योगहरू अनुदान रोकिएपछि बन्द भएका छन् । उद्योगहरू अनुदान पाइरहँदा मात्र सञ्चालनमा आएका थिए । अनुदानको सहारामा टिकिरहेका उद्योगहरूले सरकारी र गैरसरकारी निकायको सहयोग बन्द भएपछि उत्पादन नै ठप्प पारेका छन् ।
यसले स्थानीय रोजगारी र अर्थतन्त्रमा समेत प्रतिकूल प्रभाव परेको उद्योगीहरू बताउँछन् । अनुदानको लोभमा धमाधम उद्योग दर्ता गरेपनि अनुदान पाउन छोडेसँगै उद्योग बन्द हुने क्रम बढेको हो । वर्षेनी दर्ता हुने उद्योगले न त प्रशोधन तथा उत्पादन गर्न सकेका छन् या त रोजगारी सिर्जनामै टेवा पुर्याएका छन् । जुम्लामा निर्वाहमुखी, नाफामुखी, व्यावसायिकमैत्री र उत्पादनमुखी भन्दा अनुदानमुखी उद्योग बढी छन् ।
Lorem Ipsum has been the industry’s standard dummy text ever since the 1500s.
अनुदान लिनका लागि उद्योग दर्ता गर्ने र अनुदान सकिएसँगै उद्योग बन्द गर्ने प्रवृत्ति बढ्दो छ । यसले उत्पादन वृद्धि र रोजगारी सिर्जनामा कुनै योगदान गर्न सकेको छैन । टाठाबाठा र पहुँच हुनेहरुले उद्योग दर्ता गर्ने र राज्यको अनुदान लिने भन्दा कुनै काम भएको छैन । उद्योग तथा उपभोक्ता हित संरक्षण कार्यालय जुम्लाको तथ्यांक अनुसार हाल जुम्लामा एक हजार ५३५ वटा उद्योग बन्द अबस्थामा रहेका छन् ।
जिल्लामा हालसम्म सात हजार ६८२ वटा उद्योग दर्ता रहेका छन् । जसमा उद्योग उत्पादनतर्फ ४ हजार ४१७ र बाणिज्य उद्योगतर्फ ३ हजार २६५ उद्योग दर्ता रहेका छन् । जसमध्ये हाल ६ हजार १४७ उद्योग मात्रै सञ्चालनमा रहेका छन् । त्यसमा पनि उत्पादनमुखी उद्योग दर्ता भएका चार हजार ४१७ उद्योग मध्ये ३ हजार ६९ उद्योग सञ्चालनमा हुँदा एक हजार ३४८ उद्योग बन्द भएका छन् ।
त्यस्तै वाणिज्य उद्योगतर्फ दर्ता भएका तीन हजार २६५ उद्योगमध्ये तीन हजार ७८ उद्योग सञ्चालनमा छ । बाँकी १८७ वटा उद्योग बन्द भएका छन् । यसरी हालसम्म एक हजार ५३५ उद्योग बन्द भएका छन् । उद्योग तथा उपभोक्ता हित संरक्षण कार्यालय प्रमुख मन्दिरनाथ योगीले अनुदान पाउन छोडेसँगै धमाधम उद्योग बन्द हुन थालेको बताउनु भयो । विगतमा अनुदान नेता कार्यकर्ताले भनेकै भरमा पाइने भएपछि उद्योग दर्ता भएका थिए ।
अहिले अनुदानमा कडाई भएको हुँदा उद्योग बन्द भएको उहाँको भनाइ छ । पछिल्लो समय उद्योग खारेज नै गर्ने क्रम पनि बढेको छ । त्यसको एकिन तथ्यांक निकाल्दै छौँ । दर्ता उद्योगमध्ये एक हजार ५ सय भन्दाबढी उद्योगले उत्पादन प्रशोधनको कुनै काम नगरी फेरि पनि अनुदान पाउने आशमा बन्द छन् ।
अनुदान पाउने आशा नगरेका उद्योगहरु उत्पादन बिनै सरकारलाई राजस्व बुझाउनु पर्ने भएपछि धमधम बन्द गर्न थालेको प्रमुख योगीले उल्लेख गर्नुभयो । जिल्ला समन्वय समितिका प्रमुख गौरीनन्द आर्चायले जिल्लाको उद्यमशीता विकास, उत्पादन वृद्धि र प्रशोधनलाई प्रभावकारी बनाउन वास्तविक उद्यमीलाई लगानी बढाउनु पर्ने बताउनु भयो । उद्यमीका नाममा अनुदान पचाउनेलाई नियमन गर्न संयन्त्र नै खडा गर्नुपर्नेमा उहाँले जोड दिनुभयो ।
यता उद्योग वाणिज्य संघ जुम्लाका अध्यक्ष पुरिचन्द्र देवकोटाले अनुदानमुखी उद्योगलाई नियमन गर्न अनुगमन तथा निरीक्षण प्रभावकारी बनाउनु पर्ने बताउनु भयो । उहाँले राम्रो गर्ने उद्योगीलाई प्रोत्साहन गर्ने र अनुदान मात्र पचाउन उद्यमी बन्नेलाई कारबाही प्रक्रियामा लैजानुपर्ने बताउनु भयो । प्रदेश सरकारले नविकरणमा राजस्व वृद्धि गर्नु, आर्थिक मन्दी हुनु र अनुदानमा आधारित उद्योग स्वतः बन्द हुने प्रवृत्तिले उद्योग खारेजी बढ्दै गएको छ ।
तथ्यांक अनुसार गत आर्थिक वर्ष २०८०÷०८१ मा मात्रै २०३ वटा उत्पादनमुखी उद्योग दर्ता भएका हुन् । गत वर्षमा दुई सय उद्योग दर्ता हुँदा ८१ वटा उत्पादनमुखी उद्योग खारेज भएका थिए । उद्योग तथा उपभोक्ता हित संरक्षण कार्यालयले विभिन्न शीर्षकमा यस वर्ष एक करोड ४२ लाख ६ हजार ७२० रुपैयाँ राजस्व संकलन भएको जनाएको छ । कार्यालयले सिलाई कटाई, उद्योग प्रर्वद्धन, हाउस वायरिङ, राडीपाखी बुनाइ, आधारभुत ब्युटीपार्लर ड्राइभिङ तालिम, मार्वल विछ्याउनेलगायतका तालिम सञ्चालन गरेको थियो ।
