जुम्ला । करिब तीन वर्षदेखि बेपत्ता रहेका तातोपानी गाउँपालिका–६ का विकास कामी सुक्रबार सकुशल आफ्नै घर फर्किएका छन्। लामो समयदेखि बेपत्ता कामीलाइ परिवार र आफन्तजनले खोजी–तलास गर्दा पनि अत्तोपत्तो नलागेका उनी अचानक स्वदेश फर्किएपछि परिवार गाउँमा छुट्टै खालको चहलपहल र खुसीको माहोल छाएको छ।
विकास बेपत्ता भएको खबर गाउँभरि फैलिँदा परिवारका सदस्यहरू दिन–रात चिन्तित बनेका थिए। परिवारले प्रहरीदेखि लिएर मिडिया लगायतका विभिन्न निकायमा खोजतलासको पहल गरे पनि उनको अवस्था पत्ता लागेको थिएन।
“तीन वर्षसम्म हरेक ढोका ढक्ढक्यायौँ, तर कतै पनि छोराको खबर पाएनौँ। आज अचानक घर फर्किँदा सपनाजस्तो लाग्छ,” उनका आमा आँसु झार्दै बताइन्।
विकास घर फर्किएलगत्तै गाउँलेहरूले उनलाई भव्य रुपमा स्वागत गरेका छन। आफन्त र छिमेकीले फूलमाला र आलिङ्गनसहित स्वागत गर्दा वातावरण अत्यन्तै भावुक बनेको थियो। गाउँलेहरूले ‘बेहोरिन नसक्ने पीडापछि पाएको खुसी’ भनेर प्रतिक्रिया दिएका छन्।
“छोरा बेपत्ता भएपछि दिनरात रोइरहेका थियौँ, आज घर फर्केर आएको छ, यसलाई चमत्कार भन्दा कम मान्दिनौँ,” उनका बाबुले आँखामा आँसु झार्दै भने।
मेरो घरको एउटै छोरा मात्र हो । तिन तिन वर्ष पछि बेपत्ता छोरा घर फर्केर आउँदा मेरो जिन्दगी फर्किए जस्तो भएको छ। खुसिको दिप जलाउदै भने
तर उनी कहाँ थिए, कसरी तीन वर्ष बिताए भन्ने विषयमा भने स्पष्ट खुलाइएको छैन। परिवारका सदस्यहरूले पनि विवरण सार्वजनिक गर्न चाहेका छैनन्। यसैले गाउँमा विभिन्न अनुमान र कौतुहलता फैलिएको छ।
ग्रामीण क्षेत्रमा विगत केही वर्षयता रोजगारी, आर्थिक दबाब वा अन्य कारणले मानिस बेपत्ता हुने घटना बढ्दै गएको छ। विकास कामीको घरफिर्तीले यसैबीच हराएका आफ्ना परिवारजन खोजिरहेका अन्यलाई पनि आशा दिलाएको छ।
