कात्तिक १२ जुम्ला
समाजसेवी अमृता कठायत (बस्नेत) द्धारा लेखिएको ‘कर्णालीकी छोरी संघर्ष, सेवा र समर्पणको गाथा’ पुस्तक बुधबार एक समारोहबीच विमोचन गरिएको छ । जुम्लाको कनिका निशा माध्यमिक विद्यालयको प्राङ्गणमा आयोजित कार्यक्रममा कर्णाली प्रदेशसभाका सदस्य देवेन्द्र बहादुर शाही र चन्दननाथ नगरपालिका उपप्रमुख रामदेवी खड्काले संयुक्त रूपमा पुस्तक विमोचन गर्नु भएको हो ।
वि.सं. २०११ सालमा स्वर्गीय आमा लक्ष्मी कठायत र बुबा आनन्दसिंह कठायतको कोखबाट जन्मनुभएकी लेखिका अमृता कठायत (बस्नेत) कर्णालीकी शिक्षामुखि र समाजसेवि व्यक्तित्वको रूपमा परिचित हुनुहुन्छ । उहाँले वि.सं. २०३७ सालमा अंग्रेजी माध्यमबाट दुर्गमका विद्यार्थीले अध्ययन गर्न पाउन भन्ने उद्देश्यले जुम्लामा कनिका निशा माध्यमिक विद्यालय स्थापना गर्नुभएको थियो । २ सय ३२ पृष्ठको पुस्तकमा ४६ वटा विषयवस्तु समावेश छन् ।
पुस्तक मार्फत लेखिकाले छोरीले पनि शिक्षा आर्जन गर्दै देशका उच्च ओहदासम्म पुग्न सक्छिन, भन्ने सशक्त सन्देश दिनुभएको छ । विद्यालयका सञ्चालक बसन्तसिंह कठायतले आफ्नी दिदि अमृता कठायत (बस्नेत)को योगदान कर्णालीका महिलाको सशक्तिकरण र शिक्षाको क्षेत्रमा उल्लेखनिय रहेको बताउनुभयो । उहाँले भन्नुभयो, विद्यालय स्थापना देखि नै दिदिको लक्ष्य जुम्लाका बालिका र महिलाले पनि शिक्षा प्राप्त गर्न पाउन भन्ने थियो । पुस्तक त्यसै संघर्ष र यात्राको प्रतिविम्ब भएको उहाँको भनाइ छ ।
पुस्तकले कर्णाली क्षेत्रका महिलाहरूलाई शिक्षा, आत्मनिर्भरता र नेतृत्वतर्फ प्रेरित गर्ने विश्वास गरिएको कठायतले बताउनु भयो । कार्यक्रमका प्रमुख अतिथि प्रदेशसभा सदस्य शाहीले लेखिका अमृता कठायत (बस्नेत)ले जुम्लाको शिक्षा क्षेत्रमा पु¥याएको योगदान उल्लेखनिय रहेको बताउनु भयो ।
उहाँले भन्नुभयो, शिक्षा क्षेत्रमा मात्र होइन, जुम्लामा ज्येष्ठ नागरिक संघको भवन निर्माणमा समेत सहयोग गर्नु भएको छ । जुन सामाजिक जिम्मेवारीको उत्कृष्ट उदाहरण भएको उहाँको भनाइ छ । त्यस्तै, चन्दननाथ नगरपालिका जुम्लाका उपप्रमुख खड्काले महिलालाई शिक्षामा उत्प्रेरित गर्न र आत्मनिर्भर बनाउन अमृता कठायत (बस्नेत)ले पु¥याएको योगदानको प्रशंसा गर्नुभयो ।
उहाँले लेखिकाले महिलाहरूलाई शिक्षित र सचेत बनाउन गरेको प्रयासले जुम्ला मात्र होइन, सम्पूर्ण कर्णालीका महिलालाई प्रेरणा दिएको जानकारी गराउनु भयो ।
