जुम्ला साउन १२
जुम्ला — स्याउ उत्पादनमा भएको क्षतिपछि बीमा भुक्तानी माग गर्दै शिखर इन्स्योरेन्स जुम्ला शाखामा किसानहरूले थालेको तालाबन्दी ११ बुँदे सहमतिसँगै अन्त्य गरिएको छ। किसान राजबहादुर खत्रीका अनुसार, साउन २ गतेदेखि सुरु भएको तालाबन्दी विस्तृत वार्ता र सहमतिपछि खोलिएको हो।
लगातारको मौसमी प्रतिकूलताका कारण स्याउबारीमा व्यापक क्षति पुगेपछि बीमा दाबीको लागि किसानहरू पटक–पटक बीमा कम्पनी धाउँदै आएका थिए। तर सुनुवाइ नहुँदा किसानहरू आन्दोलनमा उत्रिन बाध्य भएका थिए। आन्दोलन चर्किएपछि सरोकारवाला पक्षबीच संवाद प्रक्रिया अघि बढेको र अन्ततः सहमतिमा पुगेको किसानहरूको भनाइ छ।
किसान महासंघका केन्द्रीय सदस्य तथा आन्दोलन संयोजक खड्ग बहादुर सेजुवालले बीमा कम्पनीले प्रक्रियागत कमजोरी स्वीकार्दै समस्याको समाधानतर्फ अग्रसर भएको जनाए। उनका अनुसार, कम्पनीले किसानको गुनासोलाई गम्भीर रूपमा लिँदै ७ दिनभित्र बीमा रकम भुक्तानी गर्ने सहमति जनाएको छ।
वार्ता टोलीमा शिखर इन्स्योरेन्सका तर्फबाट महाप्रबन्धक उदित प्रसाद काफ्ले, नायब प्रबन्धक सार्थक राज पाण्डे, प्रदेश प्रमुख गणेश प्रसाद जोशी, कर्णाली प्रदेश इञ्चार्ज ऋषिराम पाण्डे र जुम्ला शाखा प्रमुख लक्ष्मण उपाध्याय काफ्ले सहभागी थिए। किसान प्रतिनिधिमा सेजुवालसहित महानन्द चौलागाईं, राजबहादुर खत्री, मन्न बहादुर थापा र भैरव बहादुर धराला थिए।
सहमति अनुसार किसानहरूले बीमा दाबीका लागि आवश्यक कागजातहरू — लालपुर्जा, नागरिकता, स्वामित्व प्रमाण, लिज सम्झौता, नाता प्रमाण र चेकको प्रतिलिपि — पेश गर्नुपर्नेछ। यस्ता प्रमाण पेश गरिएको मितिले ७ दिनभित्र बीमा रकम भुक्तानी गरिनेछ। साथै, क्षतिको प्रतिवेदनका आधारमा नगद भुक्तानीको व्यवस्था मिलाइने र आवश्यकता अनुसार पुनः मूल्याङ्कन गरिने उल्लेख गरिएको छ।
सहमति पश्चात किसानहरूले बीमा भुक्तानीप्रति आशावादी भएको बताएका छन्। “हामीले आवाज उठाएपछि बल्ल सुनुवाइ भएको छ,” किसान नेता सेजुवालले भने, “अब सहमति कार्यान्वयनमा भर पर्छ।”
