पुस १६ जुम्ला ।
२०७९ सालमा सम्पन्न प्रतिनिधिसभा तथा प्रदेशसभा निर्वाचनपछि जुम्लाका उम्मेदवारहरूले निर्वाचन खर्चको विवरण नबुझाएको भन्ने समाचार केही सञ्चार माध्यम र सामाजिक सञ्जालमा फैलाईएको छ । ती समाचारले उम्मेदवारहरूलाई मात्र होइन, समग्र निर्वाचन प्रक्रियामाथि नै प्रश्न उठाएको छ । तर यथार्थ भने फरक रहेको सार्वजनिक भएको छ ।
नेकपा एमालेबाट प्रतिनिधिसभा सदस्यका उम्मेदवार रहनु भएका रतननाथ योगीले २०७९ मंसिर १९ गते नै निर्वाचनमा भएको १८ लाख ८ हजार रुपैयाँ खर्चको विवरण मुख्य निर्वाचन अधिकृतको कार्यालय जुम्लामा बुझाई सक्नु भएको प्रमाणसहित जानकारी दिइएको छ । उहाँसँगै गोमा कुँवर र ज्ञानेन्द्र शाहीले विवरण नबुझाएको भनी प्रकाशित समाचारप्रति सोही समयका उम्मेदवारहरूले आपत्ति जनाएका छन् ।
यस्तै, प्रदेशसभा तर्फ (क) क्षेत्रका उम्मेदवार धिरेन्द्रराज गिरी र (ख) क्षेत्रका उम्मेदवार टेकराज पछाईले पनि तोकिएको समयमै निर्वाचन खर्च विवरण बुझाइसकेको स्पष्ट गरिएको छ । सामाजिक सञ्जाल र केही मिडियाबाट फैलिएको भ्रमलाई चिर्दै नेकपा एमालेका युवा नेता धर्मेन्द्र रोकायाले सबै उम्मेदवारहरूले निर्वाचन अधिकृतको कार्यालयमा उपस्थित भई खर्च विवरण पेश गरेको र दर्ता भएको प्रमाण सार्वजनिक गर्नुभयो ।
उहाँले खर्च विवरण बुझाए–नबुझाएको विषयमा अन्योल रहे एकपटक निर्वाचन कार्यालय जुम्लामा पुगेर तथ्य बुझ्न सबैलाई आग्रह समेत गर्नुभयो । यो घटनाले सूचनाको विश्वसनीयता कति महत्वपूर्ण हुन्छ भन्ने कुरा फेरि एकपटक उजागर गरेको छ । अपूर्ण वा गलत जानकारीले जनमानसमा भ्रम सिर्जना गर्ने भएकाले तथ्य जाँच गरेर मात्र समाचार सम्प्रेषण गर्नु आवश्यक रहेको सरोकारवालाहरूले बताएका छन् ।
गोमा कुँवर (गौतम) ले खर्च विवरण बुझाई सकेको बताउनु भयो । खर्च विवरण बुझाए वा नबुझाएको कार्यालयले सार्वजनिक गर्नु पर्ने उहाँको भनाइ छ ।
