कातिर्क ३ जुम्ला
चन्दननाथ नगरपालिका–३ ले दिपावलि र छठ पर्वको अवसरमा खुला पुरुष फुटबल प्रतियोगिताको सुरुवात गरेको छ । सोमबारदेखि सुरु भएको प्रतियोगिताको चन्दननाथ नगरपालिकाका नगरप्रमुख राजुसिंह कठायतले उद्घाटन गर्नु भएको हो । वडाको आयोजनामा सुरु गरिएको प्रतियोगितामा जुम्लाका ४४ वटा क्लबहरूले सहभागिता रहेको छ ।
खेलकुद मार्फत युवा बिचको सम्बन्ध, एकता र उत्सवको वातावरण सुदृढ गर्न प्रतियोगिता आयोजना गरिएको वडाध्यक्ष रतन खत्रीले बताउनु भयो । जुम्लामा हालसम्म भएको फुटबल प्रतियोगितामा धेरै क्लबहरु सहभागि भएका छन् । उद्घाटन खेल ढाँणथपला युवा क्लब र आयोजक टिम बिच भएकोमा ० का विरुद्ध ४ गोलले आयोजक टिम विजयी भएको छ ।
यस्तै दोस्रो खेल गुठिचौरको फोईकालिका एपसि र चन्दननाथ नगरपालिका १० बोहोरागाउँको सिद्धगुफा युवा क्लब बिच भएकोमा ० का विरुद्ध ५ गोल गर्दै फोईकालि युवा क्लब विजयी भएको छ । उद्घाटन कार्यक्रममा स्थानीय जनप्रतिनिधि, समाजसेवी र खेलप्रेमीहरूको उपस्थिति रहेको थियो । विजेता टिमले १ लाख १ हजार र उपविजेता टिमलाई ५० हजार ५ सय रुपैयाँ करकट्टि सहित नगद पुरस्कार, मेडल र ट्रफि प्रदान गरिने संयोजक राजवहादुर खत्रीले बताउनु भयो ।
प्रतियोगिता कार्तिक १६ गतेसम्म संचालन हुने भएको छ । धेरै युवाले फुटबललाई आफ्नो प्रतिभा प्रदर्शन र पहिचान बनाउने माध्यमका रूपमा लिएका छन् । केही खेलाडीले जिल्ला बाहिरका प्रतियोगितामा समेत सहभागिता जनाउदै राम्रो प्रदर्शन गरेका छन् ।
