साउन १२ जुम्ला
जुम्लाको चन्दननाथ नगरपालिकामा कार्य सम्पादन करार सम्झौता गरेको छ । चन्दननाथ नगरपालिकाका नगर प्रमुख राजुसिंह कठायत र प्रमुख प्रशासकीय अधिकृत टेक बहादुर बुढ्थापाबीच ३६ बुँदे कार्यसम्पादन करार सम्झौता भएको हो । चालु आर्थिक वर्ष २०८२÷०८३ मा नगरपालिकाको सेवा प्रवाह, विकास निर्माण, सुशासनलाई प्रभावकारी बनाउन र वार्षिक विनियोजित बजेट र नीति कार्यक्रमको कार्यान्वयनलाई जनमुखी बनाउन कार्यसम्पादन सम्झौता गरिएको नगर प्रमुख राजुसिंह कठायतले बताउनु भयो ।
साउन १ गतेदेखि लागु हुने गरी प्रमुख प्रशासकीय अधिकृत सँग कार्यसम्पादन सम्झौता भएको कठायतले बताउनु भयो । विभिन्न पक्षलाई ध्यानमा राख्दै कसरी नगरको विकास र समृद्विमा टेवा पुराउन सकिन्छ भन्ने धेयले काम गर्न खोजिएको उहाँको भनाइ छ । कार्यसम्पादन सम्झौताले कर्मचारी र जनप्रतिनिधिलाई जवाफदेही बनाउन मद्दत पुराउने अपेक्षा गरिएको छ ।
प्रमुख प्रशासकीय अधिकृत टेक बहादुर बुढथापाले जिल्लाको एकमात्र चन्दननाथ नगरपालिकाका सेवा प्रवाह, विकास निर्माण र सुशासन प्रर्वद्धनका कामलाई प्रभावकारी रुपमा कार्यान्वन गर्न कर्मचारी र जनप्रतिनिधिको दोहोरो समन्वय सहकार्य आवश्यक रहेको बताउनु भयो ।
सुशासन व्यवस्थापन तथा संचालन ऐन, २०६४ तथा नियमावली, २०६५ निजामति सेवा ऐन, २०४९ तथा नियमावली, २०५० स्थानिय सरकार संचालन ऐन, २०७४ साथै नेपाल सरकारद्वारा समय समयमा जारी निर्देशन एवं परिपत्रमा उल्लेखित प्रावधान बमोजिमको कार्य सम्पादन गरिएको छ ।
प्रमुख प्रशासकीय अधिकृतका अनुसार, चालु आर्थिक वर्ष २०८२÷०८३ का विनियोजित बजेट र नीतिको कार्यान्वयनमा समेत यो करार सम्झौताले सहयोग पुराउने छ । सुशासन तर्फ नियमित समिक्षा,हरेक चौमासिकमा सार्वजनिक सुनुवाई, तथ्यांक अध्यावधिक,शाखाका कर्मचारीको क्षामता बृद्धि र विनियोजित कार्यक्रमको अपेक्षाकृत परिणाम हासिल गर्न सहज हुन्छ ।
सम्झौताले कर्मचारी र जनप्रतिनिधिलाई जिम्मेवारीमा बाध्य तथा उत्तरदायि बनाउने छ । जिल्लाका आठ स्थानीय तहमध्य तातोपानी गाउँपालिका र चन्दननाथ नगरपालिका बाहेक अन्य पालिकामा कार्यसम्पादन सम्झौता गर्ने गरिएको छैन् ।
