माघ २२ जुम्ला
दलित समुदायलाई निर्वाचनको समयमा मात्रै सम्झिने र मत संकलनको माध्यमका रूपमा प्रयोग गर्ने प्रवृत्ति अन्त्य गर्न दलित अगुवाहरूले आग्रह गरेका छन् । जुम्लाको चन्दननाथ नगरपालिका–३ डाँडाकोटका दलित अगुवा बालाराम नेपालीले राजनीतिक दलहरूले दलित समुदायलाई चुनावका बेला मात्रै प्राथमिकता दिने गरेको आरोप लगाउँदै यस्तो प्रवृत्तिमा परिवर्तन आवश्यक रहेको बताउनु भएको छ ।
उहाँका अनुसार अरु समय राजनीतिक रूपमा बेवास्ता गरिने दलित समुदायलाई चुनाव नजिकिँदा मत संकलन केन्द्रका रूपमा प्रयोग गर्ने गरिएको बताउनु भयो । जुम्लामा एक जना स्वतन्त्रसहित दश जना उम्मेदवार चुनावी मैदानमा रहे पनि कुनै पनि दलले दलित समुदायबाट उम्मेदवार नबनाएको प्रति उहाँले असन्तुष्टि व्यक्त गर्नुभयो ।
स्थानीय तह, प्रदेश सभा तथा प्रतिनिधि सभा निर्वाचनमा समेत दलित समुदायलाई वास्तविक नेतृत्वमा नल्याई मत संकलनको माध्यम मात्रै बनाउने प्रवृत्ति रहेको उहाँको भनाइ छ । आगामी निर्वाचनमा पनि दलित समुदायलाई टिकट नदिइए पार्टीभित्रैबाट आवाज उठाउनु पर्ने अवस्था आउने उहाँले चेतावनी दिनुभयो । चुनावका बेला दलित समुदायलाई सजिलै प्रभावमा पार्न सकिन्छ भन्ने धारणा मतमार्फत बदल्नुपर्ने आवश्यकता रहेको उहाँले उल्लेख गर्नुभयो ।
राज्यको मुलधारबाट पछि पारिएको र लामो समयदेखि उत्पीडनमा परेको समुदायका लागि कुनै पनि राजनीतिक दलले खुला हृदयले सहयोग नगरेको उहाँले आरोप लगाउनु भयो । हामी मत हाल्ने मात्रै होइनौं, उम्मेदवार बन्न पनि सक्षम छौंँ, नेपालीले भन्नुभयो, तर पहुँच र अवसरको अभावले टिकट पाउन कठिन हुने गरेको छ ।
दलित समुदायको वास्तविक मुक्ति नीति निर्माण गर्ने तहमा प्रतिनिधित्व सुनिश्चित भए मात्र सम्भव हुने उहाँको भनाइ छ । चुनावका बेला दलित समुदायलाई मत हाल्नका लागि मात्रै प्रयोग गर्न खोजिए सचेत हुन उहाँले सबैलाई अनुरोध गर्नु भएको छ ।
