भदौ ३ जुम्ला
जुम्लामा उत्पादन हुने अर्गानिक स्याउको निर्यात सुरु भएको छ । स्याउको रंग र गुलियोपनाको मात्रा बढेपछि निर्यातको प्रक्रिया प्रारम्भ भएको हो । स्याउ पाकेर खाना लायकको भएपछि औपचारिक रुपमा बजारमा बिक्रिका लागि निर्यात सुरु भएको कृषि विकास कार्यालय जुम्लाले जनाएको छ । यस अघि साउन २ गते जिल्लास्थित सरकारी तथा गैरसरकारी संघ–संस्थाको वार्षिक समिक्षा कार्यक्रममा भदौ १५ गतेपछि मात्रै निर्यात गर्ने निर्णय गरिएको थियो ।
पहिलेको निर्णयलाई उल्ट्याउँदै पाकेको स्याउ ढिलो संकलन गर्दा कुहिएर खेर जाने भएकाले निर्यात प्रारम्भ भएको कृषि विकास कार्यालय जुम्लाका प्रमुख रामभक्त अधिकारीले बताउनु भयो । योभन्दा पहिले कृषि विकास कार्यालय जुम्लाले साउन ९ गते सूचना प्रकाशन गर्दै भदौ १५ पछिमात्रै स्याउ टिप्न र निर्यात गर्न भनेको थियो । तर, लुकिछिपि बाह्य बजारमा स्याउ निर्यात हुन थालेपछि पोकेको स्याउलाई निर्यात गर्नको बाटो खुलाईएको छ ।
अधिकारीले भदौ २ गते जिल्ला समन्वय समिति जुम्लाका प्रमुख गौरीनन्द आचार्यको अध्यक्षतमा बसेको सर्वपक्षिय बैठकले पाकेको स्याउ निर्यात गर्न दिने निर्णय गरेको हो । जुम्लाको तल्लो क्षेत्रमा उत्पादित स्याउ छिटो पाक्ने भएकाले सम्बन्धित स्थानीय तहको कृषि विकास शाखाको सिफारिसमा स्याउ निर्यात गर्ने बाटो खुलेको छ । साथै साउन २७ गते पातारासी गाउँपालिकामा जफत गरि भण्डारण गरिएको तिन क्विन्टल स्याउ समेत फुकुवाई गरिएको छ ।
स्याउ पाकेर बगैँचामा बिक्रिने भएकाले निर्यातका लागि सहज बनाईएको जिल्ला समन्वय समिति जुम्लाका प्रमुख गौरीनन्द आचार्यले बताउनु भयो । सम्बन्धित स्थानीय तहको कृषि विकास शाखाको सिफारिसमा स्याउ निर्यात गर्न थालिएको छ । जुम्लाको स्याउ अर्गानिक भएकाले आन्तरिक तथा बाह्य बजारमा माग उच्च रहने अपेक्षा गरेको छ । त्यस्तै किसानलाई स्याउ प्याकिङका लागि कृषि विकास कार्यालयले अनुदानमा ‘जुम्ला एप्पल’ लेखिएको कार्टुन वितरण गर्दै आएको छ ।
यस वर्ष पनि अनुदानका कार्टुन वितरण गर्ने कोटेशन खोल्ने तयारी भईरहेको कृषि विकास कार्यालय जुम्लाले जनाएको छ । कार्टुन खरिदका लागि ६ लाख विनियोजन भएको छ । आर्थिक वर्ष २०८०÷८१ मा समयमै कार्टुन खरिद नगर्दा १० लाख बजेट फ्रिज भएको थियो । यस वर्ष समयमै खरिद गरी अनुदानको कार्टुन वितरण गर्न किसानले माग गरेका छन् । यता व्यापारी कालो कामीले भने स्याउ संकलन र निर्यात गर्न पाउने निर्णय गरेपनि अविरल वर्षाका कारण कर्णाली राजमार्ग ध्वस्त भएकाले गत वर्ष जस्तै करोडौँका स्याउ बाटोमै कुहिने जोखिम रहेको बताउनु भयो ।
ढुवानीमा सहुलियत लगायतका सुविधा राज्यले नदिदा किसान र व्यापारी मारमा पर्ने गरेका छन् । जुम्लामा ४ हजार २ सय ५० हेक्टर जमिनमा स्याउ खेति हुने गरेको छ । यस पटक स्याउको चिचिला लागेको समयमा असिना पानीले परेकोले उत्पादनमा ह्रास आएको किसानहरुको भनाइ छ ।
