जुम्ला — जिल्ला प्रशासन कार्यालय जुम्लाको नेतृत्वमा साउन १३ गते सुरु भएको बडिमालिका तिर्थ यात्रा आज साउन ३० गते सम्पन्न भएको छ। सरकारी टोलीसहित स्थानीय श्रद्धालुहरूको सहभागितामा सम्पन्न यो शताब्दी–पुरानो धार्मिक यात्रा करिब दुई हप्तासम्म हिमाल, खोल्सा र दुर्गम भूभाग पार गर्दै सम्पन्न भएको हो।
यस वर्ष पनि मुख्य पुजारीको जिम्मेवारी विष्णुप्रसाद उपाध्यायले सम्हाले। उनी लगातार १५ वर्षदेखि यो कठिन यात्रा एकपटक पनि छुट्याए बिना गर्दै आएका छन्। “यो देवताको कृपा हो, म ६० वर्ष पुगुन्जेलसम्म यो सेवा निरन्तर गर्नेछु। यो व्यक्तिगत होइन, समाज र परम्पराको लागि हो,” उपाध्यायले यात्राबाट फर्किएलगत्तै भने।
यात्राबाट फर्किएलगत्तै जिल्ला प्रशासन कार्यालय र जिल्ला समन्वय समिति जुम्लाले उपाध्यायलाई ‘कदर पत्र’ र सम्मान अर्पण गरेको छ। स्थानीय प्रशासनका अनुसार यो सम्मान उनको दीर्घकालीन सेवा र धार्मिक संस्कृतिप्रतिको योगदानको कदर स्वरूप प्रदान गरिएको हो।
बडिमालिका पुग्ने बाटो निकै चुनौतीपूर्ण छ—उच्च पहाडी डाँडा, चिप्ला पदमार्ग, वर्षाको भेल र चिसो मौसम पार गर्दै यात्रुहरू गन्तव्यमा पुग्छन्। बडिमालिका धाममा पुगेर विशेष पूजापाठ, बलि तथा सामूहिक भजन–कीर्तन गरी यात्रा सम्पन्न गरिन्छ।
स्थानीय बासिन्दाहरूका अनुसार बडिमालिका यात्रा केवल धार्मिक आस्था मात्र होइन, सामुदायिक एकता, सहकार्य र अनुशासनको पनि प्रतीक हो। उनीहरू भन्छन्, “यो हाम्रो पहिचान हो, जसलाई पुस्तौँदेखि निरन्तरता दिइँदै आएको छ।”यो वर्षको यात्रा पनि जुम्लाको धार्मिक–सांस्कृतिक सम्पदामा थपिएको अर्को गौरवपूर्ण अध्याय बनेको छ।
