भदौ २७ जुम्ला
जुम्लामा दलीय संयन्त्रको प्रेस विज्ञप्ती जारी भएको छ । नेपाली काँग्रेस, नेकपा एमाले, नेकपा माओवादी केन्द्र र नेकपा एकिकृत समाजवादी दलहरुको संयुक्त विज्ञप्ती जारी भएको हो । चार दलको बैठक बसि मुलुकमा पछिल्लो समयमा उत्पन्न भएको विषम् र असामन्य परिस्थिति सम्बन्धि गम्भीर र संवेदनशील बनेको उल्लेख गरिएको छ ।
भदौ २३ र २४ गतेका दिन काठमाण्डौँ र विभिन्न शहरमा सामाजिक सञ्जालको निर्वाध सञ्चालन, भ्रष्टाचार र नातावादको विरोध, सुशासन लगायत विभिन्न माग राखेर भएको जेन–जी आन्दोलनका क्रममा भएको जनधनको क्षतिवाट स्तब्ध हुनुका साथै सो घटनामा परी जीवन गुमाउनु हुने सबै युवाहरुप्रति हार्दिक श्रद्धाञ्जली अर्पण गरिएको छ ।
उक्त आन्दोलनका क्रममा ठुलो संख्यामा घाइते भएकाहरुको शीघ्र स्वास्थ्य लाभको कामना गर्दै आफन्तको वियोगको पीडामा रहनुभएका परिवारजनमा गहिरो समवेदना व्यक्त गरिएको छ । अहिलेको विषम् परिस्थितिमा शान्ति, संवाद र समाधानका लागि स्पष्ट हुन समेत दलीय संयन्त्रले अनुरोध गरेको छ । जेन–जी आन्दोलनका क्रममा भएको अकल्पनीय आगजनी, तोडफोड, आक्रमण र लुटपाटले गर्दा राष्ट्रले भयावह विनाश व्यहोर्नु परेको विज्ञप्तीमा उल्लेख गरिएको छ ।
यसमा संलग्न दोषीहरुको पहिचान गरेर कडा कानुनी कारवाही गरिनु पर्ने माग गर्दै यति ठुलो विनाश रोक्न राज्यका सुरक्षा निकायहरु किन प्रभावकारी हुन नसकेको भन्ने विषयमा पनि समिक्षा तथा जवाफको दलहरुले माग गरेका छन् । अबको राजनीतिक निकास संविधान सम्मत् रुपमा र लोकतान्त्रिक विधिवाटै खोज्न पनि आग्रह गरिएको छ ।
सुशासन, नातावादको अन्त्य, तीव्र विकास, रोजगरी सिर्जना जस्ता विषयहरुको संवोधन गरिनु पर्ने विज्ञप्तीमा भनिएको छ । यसका लागि संविधानको मर्म अनुरुप सार्थक संवाद र नेतृत्वदायी पहलकदमी लिन राष्ट्रपतिलाई ध्यानाकर्षण गराईएको छ । यसैगरी, जेन–जी आन्दोलनका एजण्डाहरुको सम्मान गर्दै वर्तमान परिस्थितिमा संविधान र संसदीय प्रक्रिया भित्रवाट समाधान खोज्नुपर्छ र यसका लागि सर्वपक्षीय बैठक आव्हान गर्न अनुरोध गरिएको छ ।
धमिलो पानीमा माछा मार्ने र घुसपैठ हुने प्रवृत्ती प्रति सचेत रहँदै संविधान, लोकतन्त्र, गणतन्त्र, शान्ति र राष्ट्रिय स्वाभिमानका पक्षधर सबै राजनीतिक दलहरुलाई केन्द्र देखि स्थानीय तह सम्म एकजुट र एकमत रहन साथै संवैधानिक तथा लोकतन्त्रको उपलब्धिको रक्षाका लागि समझदारी निर्माण गर्न आह्वान गरिएको छ । जुम्लाका दलीय संयन्त्र सबै पक्ष र पुस्तालाई संयमता, उच्च सुझबुझ, सजगता र शान्तिपूर्ण रुपमा निकासका पक्षमा रहन अपिल समेत गरिएको छ ।
