जुम्ला, भदौ २९–
जुम्लाको तातोपानी डागिबाडा हुँदै हाकु ऐरेनी, गौतमबाडा लिताकोटसम्म एउटै बौलाह कुकुरले आतंक मच्चाउँदा करिब १४ जना स्थानीयवासी घाइते भएका छन्। तीमध्ये १० जनाको जुम्ला अस्पतालको आकस्मिक कक्षमा उपचार भइरहेको छ।
प्राप्त जानकारी अनुसार, एकै कुकुरले फरक–फरक स्थानमा गएर मानिसहरूलाई टोक्दै हिंडेको र धेरैजसोलाई घाइते बनाएको बताइएको छ। टोकाइका घाइतेहरूमा महिला, बालबालिका तथा वृद्ध नागरिकसमेत रहेका छन्।
तर, उपचारका लागि जुम्ला अस्पताल पुगेका घाइतेहरूले रेबिज खोप उपलब्ध नभएको गुनासो गरेका छन्। अस्पताल प्रशासनले समेत हाल खोपको स्टक नभएको पुष्टि गरेको छ, जसले पीडितहरू थप जोखिममा परेका छन्।
स्थानीय बासिन्दाहरू त्रसित भएका छन् भने स्वास्थ्य तथा पशु सेवा निकायहरूलाई तत्काल प्रभावकारी कदम चाल्न आग्रह गरिएको छ। रेबिज जस्तो प्राणघातक रोगको जोखिमलाई मध्यनजर गर्दै खोपको आपूर्ति गर्न स्थानीय तह, स्वास्थ्य कार्यालय तथा केन्द्र सरकारसँग माग गरिएको छ।
स्थानीय बासिन्दाहरूले रेबिज खोप जस्तो अति आवश्यक स्वास्थ्य सामग्री समेत अस्पतालमा नहुनु गम्भीर लापरवाही भएको बताएका छन्। “हामी यत्रो टाढाबाट उपचार गर्न आएको, तर खोप नै छैन भनेर फर्काइन्छ,” एक पीडितका आफन्तले गुनासो गरे।
रेबिज एक पटक शरीरमा प्रवेश गरेपछि समयमै उपचार नगरे प्राणघातक बन्न सक्ने संक्रमण हो। कुकुरको टोकाइपछि तुरुन्त घाउ सफा गर्ने, स्वास्थ्य संस्थामा सम्पर्क गर्ने र रेबिज खोप लगाउने उपाय अनिवार्य हुन्छ। तर खोप अभावकै कारण अहिले जुम्लामा ठूलो जनस्वास्थ्य संकटको अवस्था देखिएको छ।
