जिल्ला फुटबल संघ, जुम्लाले आयोजना गरेको प्रतियोगिताको फाइनल खेल मंगलबार चन्दननाथ नमुना मावि र जेआर कर्णाली बोर्डिङबीच भएको थियो। खेलमा चन्दननाथले पहिलो हाफमा दुई र दोस्रो हाफमा एक गरी तीन गोल गर्दै सहज जित हात पारेको हो।
जेआर कर्णालीले खेलभर उत्कृष्ट प्रदर्शन गरे पनि गोल गर्न नसक्दा उपविजेतामा सीमित हुनुपर्यो। दोस्रो हाफमा पाएको पेनाल्टी पनि सदुपयोग गर्न नसक्दा उपाधि हातबाट फुत्किएको हो।
प्रतियोगितामा छात्रतर्फ जिल्लाभरका १४ टिमले सहभागिता जनाएका थिए। छात्रातर्फ भने सरस्वती मावि, रिनिले उपाधि जित्न सफल भयो। छात्रा र छात्रतर्फ गरेर कुल २४ विद्यालयले प्रतिस्पर्धा गरेका थिए।
विजेता र उपविजेता टोलीलाई शुक्रबार ट्रफी र मेडल वितरण गरिएको एन्फा जुम्लाका अध्यक्ष भरत बहादुर बुढ्थापाले बताए। उनका अनुसार संविधान दिवसको अवसर पारेर फाइनल खेल आयोजना गरिएको हो।
जिल्ला समन्वय समिति जुम्लाका प्रमुख गौरीनन्द आचार्य, प्रमुख जिल्ला अधिकारी केदारनाथ शर्मा लगायतको उपस्थितिमा सम्पन्न फाइनल खेल विवादरहित र उत्साहजनक बनेको आयोजकको दाबी छ।
यद्यपि खेलप्रति विद्यार्थीको आकर्षण देखिए पनि आधारभूत ज्ञान र तालिमको कमी झल्किएको टिप्पणी गरिएको छ। विद्यालयका खेल प्रशिक्षकहरूले अझ धेरै मेहनत गर्नुपर्ने आवश्यकतामा सरोकारवालाको जोड छ।
