पुस १४ जुम्ला
जुम्लाको चन्दननाथ नगरपालिका वडा नम्बर ७ मा ज्येष्ठ नागरिक तथा अपांगता भएका व्यक्तिलाई न्यानो कपडा वितरण गरिएको छ । चिसो मौसमलाई मध्यनजर गर्दै वडा कार्यालयले करिब ३ लाख रुपैयाँको लागतमा न्यानो कपडा वितरण गरेको हो । वडाध्यक्ष गणेश महतका अनुसार ७० वर्षभन्दा माथिका ८३ जना र ६० वर्षभन्दा माथिका १ सय ४ जना ज्येष्ठ नागरिकलाई न्यानो कपडा उपलब्ध गरिएको बताउनु भयो ।
साथै, ७ जना पूर्ण अपांगता भएका र ११ जना आंशिक अपांगता भएका व्यक्तिलाई पनि न्यानो कपडा वितरण गरिएको उहाँले जानकारी दिनुभयो । जुम्लाको मौसम अत्यन्त चिसो हुने भएकाले राहत स्वरूप न्यानो कपडा वितरण गरिएको वडाध्यक्ष महतको भनाइ छ । अहिले जुम्लाको तापक्रम माइनस ४ डिग्रीसम्म झरेको छ ।
यस्तो चिसोमा ज्येष्ठ नागरिक र अपांगता भएका व्यक्ति बढी प्रभावित हुने भएकाले वडाका तर्फबाट न्यानो कपडा वितरण गरिएको उहाँको भनाइ छ । चिसोबाट हुने सम्भावित जोखिम कम गर्न र ज्येष्ठ नागरिक तथा अपांगता भएका व्यक्तिलाई सहजता प्रदान गर्ने उद्देश्यले आगामी दिनमा पनि यस्ता सामाजिक सहयोगका कार्यक्रमलाई निरन्तरता दिइने वडा कार्यालयले जनाएको छ ।
