साउन ११ जुम्ला
जुम्ला जिल्ला तातोपानी गाउँपालिका–४ स्थित पाण्डेवाडामा काठ बोकेको ट्याक्टरबाट खसेर एक जना सरकारी कर्मचारी गम्भीर घाइते हुनु भएको छ । आईतबार दिउँसो करिब २ः३० बजे तातोपानी खोलाबाट संकलन गरिएका काठहरू लोड गरी फर्किने क्रममा क १ त १२ नम्बरको ट्याक्टर दुर्घटना परेको हो ।
दुर्घटनामा ५५ वर्षीय गणेश पाण्डे घाइते हुनु भएको छ । घटनास्थल सदरमुकामबाट पश्चिमतर्फ करिब ११ किलोमिटर दुरीमा रहेको छ । डिभिजन वन कार्यालय जुम्लामा कार्यरत खरिदार पाण्डे काठसहित कार्यालयतर्फ फर्किदै गरेका बेला ट्याक्टरबाट खसेर गम्भीर घाइते भएको स्थानीय प्रत्यक्षदर्शीहरूले जानकारी दिएका छन् ।
पाण्डेसँगै सवार सोही गाउँपालिकाका अर्का स्थानीय बासिन्दा पनि ट्याक्टरबाट खख्नु भएको थियो । टाउकोमा गम्भीर चोट लागेका पाण्डेलाई घटनापछि डिभिजन वन कार्यालयकै नायब सुब्बा रविन्द्र अधिकारीले तत्काल उद्धार गरी साँझ कर्णाली स्वास्थ्य विज्ञान प्रतिष्ठान जुम्ला पु¥याएको थियो ।
स्वास्थ्यकर्मी भक्ति प्रसाद पाण्डेका अनुसार, गणेश पाण्डेको टाउकोमा चोट लागेको छ र अवस्था हाल जोखिममा नरहको बताउनु भयो । ट्याक्टर चालक टेक बहादुर मगरलाई प्रहरीले नियन्त्रणमा लिएको छ । प्रहरीका अनुसार, घटनाको अनुसन्धान भइरहेको जनाएको छ ।
