माघ ६
जुम्ला । तिला गाउँपालिका–९ अन्तर्गत पर्ने रासा मालापानी गाउँ आज पनि सडक सञ्जाल र विद्युत् सुविधाबाट टाढै रहेको छ। दुर्गम भौगोलिक अवस्था र लामो दुरीका कारण यहाँका बासिन्दाले आधारभूत सेवा–सुविधा लिन ठूलो सास्ती भोग्दै आएका छन्।
स्थानीय बासिन्दा बलबहादुर थापाका अनुसार सामान्य प्रशासनिक काम, स्वास्थ्य उपचार, शिक्षा तथा दैनिक उपभोग्य सामग्री लिन घण्टौँदेखि दिनभरि पैदल यात्रा गर्नुपर्ने अवस्था छ। “बिरामी परे समयमा स्वास्थ्य संस्थासम्म पुर्याउन नसक्दा ज्यानसमेत जोखिममा पर्छ,” उनले दुखेसो पोखे।
विद्युत् सुविधा नपुगेकाले गाउँमा आज पनि झर्रो र टुकीको उज्यालोमा जीवन चलाउनुपरेको छ। अँध्यारोका कारण विद्यार्थीको पठनपाठनमा प्रत्यक्ष असर परेको छ भने रातिको समय असुरक्षितसमेत महसुस हुने स्थानीयको गुनासो छ। सञ्चार सुविधासमेत कमजोर हुँदा मोबाइल चार्ज गर्न र सूचना पाउन टाढा जानुपर्ने बाध्यता रहेको उनीहरू बताउँछन्।
सडक पहुँच नहुँदा कृषि उपज बजारसम्म पुर्याउन कठिन भएको छ। यसले गर्दा स्थानीय किसानले आफ्ना उत्पादन उचित मूल्यमा बेच्न नपाएको र कतिपय अवस्थामा उत्पादन खेर जान थालेको स्थानीय बताउँछन्। सडक अभावकै कारण कृषि, स्वास्थ्य, शिक्षा तथा अन्य विकास कार्यक्रम प्रभावकारी रूपमा कार्यान्वयन हुन नसकेको उनीहरूको भनाइ छ।
स्थानीयवासीले पटक–पटक वडा, गाउँपालिका तथा सम्बन्धित निकायमा सडक र विद्युत् विस्तारका लागि माग राख्दै आए पनि हालसम्म ठोस पहल हुन नसकेको गुनासो गरेका छन्। उनीहरूले आधारभूत पूर्वाधारको पहुँच नपुग्दासम्म गाउँको समग्र विकास सम्भव नहुने भन्दै स्थानीय सरकार र संघीय सरकारको ध्यानाकर्षण गराएका छन्।
