पुस २० जुम्ला
नेकपा एमाले जुम्ला जिल्लाका अध्यक्ष शान्तिलाल महतको नाम आगामी फाल्गुन २१ गते हुने प्रतिनिधिसभा निर्वाचनका लागि एकल रूपमा सिफारिस गरिएको छ । पार्टीको जिल्ला कमिटीको हालै सम्पन्न बैठकले महतलाई प्रतिनिधिसभा सदस्यका लागि उपयुक्त उम्मेदवार ठहर गर्दै सर्वसम्मत रूपमा एकल सिफारिस गर्ने निर्णय गरेको हो । संगठन निर्माणमा लामो समयदेखि सक्रिय रहँदै आउनु भएका महतले जिल्लाको राजनीतिक, सामाजिक तथा विकासका मुद्दामा निरन्तर योगदान पु¥याउँदै आएको मूल्यांकनका आधारमा उहाँको नाम अघि सारिएको हो ।
विशेषगरी जुम्लाको भौगोलिक विकटता, विकासका चुनौती र जनताको आवाजलाई केन्द्रीय तहसम्म प्रभावकारी रूपमा पु¥याउन सक्ने क्षमताका कारण महतलाई प्रतिनिधिसभाको उम्मेदवारका रूपमा सिफारिस गरिएको नेकपा एमाले जुम्लाका प्रचार विभाग प्रमुख सरोज शाहीले बताउनु भयो । जिल्ला कमिटी जुम्लाको सचिवालय बैठकमा सहभागी नेताहरूले पार्टी संगठनलाई सुदृढ बनाउने, कार्यकर्ताबीच एकता कायम गर्ने र स्थानीय तहदेखि केन्द्रसम्म जनताका सवाललाई उठान गर्न महतले खेलेको भूमिकाको प्रशंसा गरेका थिए ।
पार्टी नेतृत्वका अनुसार संगठनप्रतिको निष्ठा, राजनीतिक अनुभव र जनसम्पर्कको आधारमा महतलाई एकल सिफारिस गरिएको शाहीले बताउनु भयो । यसैगरी बैठकमा प्रतिनिधिसभा निर्वाचनलाई लक्षित गर्दै आगामी रणनीति, संगठन विस्तार, चुनावी तयारी तथा कार्यकर्ताको भूमिकाबारे पनि विस्तृत छलफल गरिएको थियो ।
निर्वाचनलाई सफल बनाउन पार्टी पंक्ति एकताबद्ध भएर अघि बढ्ने निर्णय समेत बैठकले गरेको जनाइएको छ । एकल सिफारिस भएपछि प्रतिक्रिया दिदै अध्यक्ष महतले पार्टीले दिएको जिम्मेवारीलाई सम्मानका रूपमा लिएको बताउँदै जुम्लाको विकास, सुशासन र जनताको जीवनस्तर उकास्ने सवाललाई प्राथमिकतामा राखेर अघि बढ्ने प्रतिबद्धता जनाउनु भएको छ ।
उहाँले पार्टी नेतृत्व, कार्यकर्ता तथा जुम्लावासीप्रति आभार व्यक्त गर्दै आगामी निर्वाचनमा जनताको विश्वास जित्ने गरी काम गर्ने बताउनु भएको छ । नेकपा एमाले जुम्लाले अब उक्त सिफारिसलाई प्रदेश तथा केन्द्रीय तहमा पठाउने प्रक्रिया अगाडि बढाउने जनाएको छ । अन्तिम उम्मेदवार चयन पार्टीको केन्द्रीय निर्णय अनुसार हुने जनाइएको छ ।
