जुम्ला । पातारासी गाउँपालिकामा आज दिउँसो भएको ट्याक्टर दुर्घटनामा एक किशोरको ज्यान गएपछि स्थानीयवासी स्तब्ध बनेका छन् । दिउँसो करिब ४ बजेर ३० मिनेट जाँदा पातारासी–१ सेलगढी गाउँ नजिक ढुङ्गा ढुवानीमा रहेको ट्याक्टरले ठक्कर दिँदा पातारासी–२ का १७ वर्षीय नन्दराम बुढाको मृत्यु भएको छ ।
घटनास्थल नजिकै गाउँको बाटो हुँदै पैदल हिँडिरहेका नन्दरामलाई क.०२–००१ ट ०१३८ नम्बरको ट्याक्टरले अचानक ठक्कर दिएको हो। स्थानीयले गम्भीर घाइते अवस्थामा उद्धार गरेर उपचारका लागि लैजाने प्रयास गरे पनि उनको घटनास्थलमै मृत्यु भएको जनाइएको छ।
जिल्ला प्रहरी कार्यालय जुम्लाका अनुसार दुर्घटनामा संलग्न ट्याक्टर चालक धर्मेन्द्र बुढा हाल फरार छन्। उनकाे खोजी कार्य तीव्र गतिमा भइरहेको प्रहरीको भनाइ छ।
दुर्घटनापछि गाउँमा शोकको माहोल छ। मृतक नन्दराम स्थानीय गोरबहादुर बुढाका छोरा हुन्। परिवारका सदस्य र छिमेकी शोकमा डुबेका छन्।
प्रहरीले ट्याक्टर नियन्त्रणमा लिएर थप अनुसन्धान अगाडि बढाएको जनाएको छ। स्थानीय सडकमा भारी सवारी साधनको लापरबाही बढ्दै गएको भन्दै बस्तीवासीलगायत जनप्रतिनिधिहरुले कडाइका साथ निगरानी बढाउन माग गरेका छन्।
