माघ २० जुम्ला
प्रगतिशील लोकतान्त्रिक पार्टीबाट प्रतिनिधि सभा सदस्यका उम्मेदवार मनऋषि धितालले चुनावी खर्च जुटाउन पुस्तक बिक्री अभियान सुरु गर्नु भएको छ । निर्वाचनका बेला चन्दा र सहयोग लिएर खर्च जुटाउने परिपाटीको अन्त्य गर्न आफूले यो अभियान सुरु गरेको उहाँले बताउनु भयो । चन्दा र सहयोगमा निर्भर नहुने बताउँदै उहाँले आफ्नै लेखनबाट प्राप्त आम्दानी निर्वाचनमा खर्च गर्ने स्पष्ट पार्नु भएको छ ।
पुस्तक बिक्रीबाट संकलन भएको रकम चुनावी खर्चमा प्रयोग गरिने उहाँको भनाइ छ । धितालले २०८० सालमा प्रकाशित आफ्ना आठ वटा पुस्तकलाई ‘बुक बन्डल’का रूपमा पाँच हजार रुपैयाँमा बिक्री गरिरहनु भएको छ । दर्शन, राजनीति, समाज र वैचारिक बहससँग सम्बन्धित ती पुस्तकमार्फत चुनावी यात्रामा साथ दिन उहाँले नागरिकलाई अनुरोध गर्नु भएको छ ।
राजनीतिमा पैसाको स्रोत सार्वजनिक हुनुपर्ने बताउँदै धितालले यो अभियानलाई दान नभई विचारप्रतिको समर्थनका रूपमा व्याख्या गर्नु भएको छ । पुस्तक किन्ने व्यक्ति चुनावी खर्चमा मात्र नभई विचारको यात्रामा समेत सहभागी हुने उहाँको भनाइ छ । नेपालमा चुनाव महँगो बन्दै गएको, पैसावाला उम्मेदवारहरू अघि बढ्ने र साधारण तर सक्षम व्यक्तिहरू पछाडि पर्ने प्रवृत्तिप्रति असन्तुष्टि व्यक्त गर्दै धितालले विचार र नैतिकताबाट राजनीति सुरु हुनुपर्ने धारणा राख्नु भएको छ ।
उहाँको यस पहलले स्थानीय तहमा चासोसँगै बहस पनि जन्माएको छ । कतिपयले यसलाई प्रेरणादायी र साहसी कदमका रूपमा हेरेका छन् भने यसले मतदाता र उम्मेदवारबीचको सम्बन्धलाई फरक ढंगले परिभाषित गरेको टिप्पणी गरिएको छ ।
