भदौ १९ जुम्ला
कर्णाली स्वास्थ्य विज्ञान प्रतिष्ठान जुम्लाको रिक्त रजिष्ट्रार पदमा लक्ष्मीचन्द्र महत नियुक्त हुनु भएको छ । स्वास्थ्य तथा जनसंख्या मन्त्री प्रदीप पौडेलले प्रतिष्ठान ऐन, २०६८ तथा मन्त्रालय मातहतका निकायका पदाधिकारीको नियुक्ति र मनोनयन सम्बन्धी मापदण्ड २०७३ बमोजिम प्रतिष्ठानका उपकुलपति डा. पुजन रोकायाले गरेको सिफारिसका आधारमा महतलाई नियुक्ति गर्नु भएको हो ।
महत कर्णालीकै बौद्धिक, शालिन र अनुभवि व्यक्तिका रूपमा परिचित हुनुहुन्छ । हाल त्रिभुवन विश्वविद्यालयबाट विद्यावारिधि (PHD) अध्ययनरत महतको शोधकार्य जनस्वास्थ्यसँग सम्बन्धित छ । उहाँले २०७७ सालदेखि घरायसी खानेपानी, सरसफाइ तथा स्वच्छता (wash) सेवा र त्यसको पानीजन्य रोगसँगको सम्बन्ध विषयमा अनुसन्धान गरि रहनु भएको छ ।
उहाँले २०५७ सालमा स्नातकोत्तर तथा २०६९ सालमा एमफिल पुरा गर्नु भएको छ । विगत साढे दुई दशकदेखि नेपाल सरकारका विभिन्न द्धिपक्षीय तथा बहुपक्षीय परियोजना र कार्यक्रममा व्यवस्थापकीय जिम्मेवारी सम्हाल्दै आउनु भएका महत पछिल्ला वर्षहरूमा संयुक्त राष्ट्रसंघ र युएसएआईडका परियोजनामा क्षमता विकास तथा प्रशिक्षण विशेषज्ञको रूपमा कार्यरत हुनुहुन्थ्यो ।
नीति अनुसन्धान, परियोजना व्यवस्थापन र संस्थागत क्षमता विकासका क्षेत्रमा विशेष दक्षता हासिल गरेका महतको अनुभव र नेतृत्वले प्रतिष्ठानलाई थप प्रभावकारी बनाउन मद्दत पुग्ने विश्वास गरिएको छ । नवनियुक्त रजिष्ट्रार चन्दननाथ नगरपालिका १० बोहोरा निवासी हुनुहुन्छ ।
