माघ १५ जुम्ला
आगामी फागुन २१ गते हुने प्रतिनिधि सभा सदस्य निर्वाचन नजिकिँदै जाँदा जुम्लामा उम्मेदवारहरू मतदाता फकाउन व्यस्त देखिएका छन् । जुम्लाका गाउँ–गाउँ पुगेर उम्मेदवारहरूले आफ्ना एजेण्डा प्रस्तुत गर्दै मत मागि रहेका छन् । यसपटक जुम्लाबाट प्रतिनिधि सभाका लागि दश जना उम्मेदवार चुनावी प्रतिस्पर्धामा छन् । सबै उम्मेदवार आ–आफ्नो पक्षमा जनमत जुटाउन सक्रिय छन् ।
नेकपा एमालेबाट प्रतिनिधि सभा सदस्यका उम्मेदवार शान्तिलाल महतले जनताको आवश्यकता र चाहनालाई मध्यनजर गर्दै मत मागि रहेको बताउनु भएको छ । विकास, रोजगारी र आधारभूत सेवामा केन्द्रित एजेण्डाका साथ आफु मतदातामाझ पुगिरहेको बताउनु भयो । २०७९ सालको निर्वाचनमा समानुपातिक तर्फ नेकपा एमाले जुम्लाको पहिलो पार्टी बनेको थियो । सो निर्वाचनमा एमालेले १० हजार ५ सय ४८ मत प्राप्त गरेको थियो ।
यही परिणामलाई आधार मानेर यसपटक पनि निर्वाचन आफ्नो पक्षमा आउने महतको दाबी छ । पार्टीप्रति प्रतिबद्ध मतदाता अन्य दलको तुलनामा बढी भएकाले चुनावी परिणाम एमालेको पक्षमा आउने उहाँको भनाइ छ । यस्तै, नेपाली कांग्रेसका उम्मेदवार दीप बहादुर शाहीले जुम्ला घर भई हाल सुर्खेतमा बसोबास गर्दै आएका मतदातासँग भेटघाट गरी मत माग्नु भएको छ । सुर्खेतमा रहेका जुम्लेली मतदातालाई आफ्नो पक्षमा मतदान गर्न उहाँले अनुरोध गर्नु भएको छ ।
२०७९ सालको निर्वाचनमा नेपाली कांग्रेसले जुम्लामा १० हजार ४ सय ६ मत प्राप्त गरेको थियो । हाल जुम्लाका छवटा स्थानीय तहमा कांग्रेसको नेतृत्व रहेकाले त्यसको प्रभाव यसपटकको निर्वाचनमा पर्ने कांग्रेसको विश्वास छ । यही आधारमा कांग्रेसले मतदाता फकाउने अभियानलाई तीव्र बनाएको छ । नेपाली कम्युनिष्ट पार्टीले २०७९ सालको निर्वाचनमा जुम्लामा ८ हजार ९ सय ६० मत प्राप्त गरेको थियो । उक्त पार्टीका उम्मेदवार नरेश भण्डारी पनि मतदाता रिझाउन गाउँ–गाउँ पुगेर घरदैलो अभियानमा सक्रिय हुनुहुन्छ ।
पार्टीको संगठन र विगतको मत परिणामलाई आधार मानेर भण्डारीले आफ्नो पक्षमा जनमत सृजना गर्ने प्रयास गरिरहनु भएको छ । यसैगरी राष्ट्रिय प्रजातन्त्र पार्टी (राप्रपा)का उम्मेदवार ज्ञान बहादुर शाही (ज्ञानेन्द्र) पनि मतदाता फकाउन गाउँ पस्नु भएको छ । २०७९ सालको निर्वाचनमा उहाँले २२ हजारभन्दा बढी मत ल्याएर विजयी हुनु भएको थियो ।
त्यतिबेला राप्रपाले समानुपातिक तर्फ ५ हजार ७ सय ९६ मत प्राप्त गरेको थियो । विदेशमा दुःख पाइरहेका नेपालीहरूको उद्धारमा आफुले भूमिका खेलेको र आगामी दिनमा पनि जनताको आवाज संसदमा बुलन्द रूपमा उठाउने क्षमता अन्य उम्मेदवार भन्दा आफुमा रहेको भन्दै उहाँ मत मागि रहनु भएको छ । २०७९ सालको निर्वाचनमा समानुपातिक तर्फ प्राप्त मतका आधारमा नेकपा एमाले जुम्लाको पहिलो पार्टी बनेको थियो ।
त्यही निर्वाचनमा नेकपा एमालेबाट प्रदेश सभा निर्वाचन क्षेत्र नम्बर (ख) मा टेकराज पछाईले गठबन्धनका उम्मेदवारलाई पराजित गर्दै निर्वाचित हुनु भएको थियो । यी तथ्यलाई आधार मानेर हालको निर्वाचनमा पनि एमालेले सहजै जित्ने नेकपा एमाले जुम्लाका नेता देविलाल थापाले बताउनु भएको छ ।
वृद्ध भत्ता कार्यक्रमदेखि समग्र देश निर्माणसम्म एमालेले महत्वपूर्ण योगदान दिएको उल्लेख गर्दै जनताले भारी मतका साथ पार्टीलाई विजयी गराउने उहाँको दाबी छ । निर्वाचन मिति नजिकिँदै जाँदा जुम्लामा उम्मेदवारहरूको घरदैलो, भेटघाट र प्रचार अभियान थप तीव्र बन्दै गएको छ । आगामी फागुन २१ गते मतदाताले कसलाई विश्वास गर्छन् भन्ने कुरा निर्वाचन परिणामले नै स्पष्ट गर्ने छ ।
