जुम्ला । राष्ट्रिय स्वतन्त्र पार्टी (रास्वपा) जुम्लाकी प्रतिनिधि सभा सदस्य उम्मेदवार बिनिता कठायतले राष्ट्रिय प्रजातन्त्र पार्टी (राप्रपा) का उम्मेदवार ज्ञानेन्द्र बहादुर शाहीले निर्वाचनलाई प्रभावित पार्ने उद्देश्यले भ्रामक र दुष्प्रचारयुक्त गतिविधि गरिरहेको गम्भीर आरोप लगाएकी छन्।
उनका अनुसार गाउँ–गाउँमा पुगेर प्रत्यक्षतर्फ हलो र समानुपातिकतर्फ घण्टीमा मतदान गर्नुपर्ने भन्दै मतदातालाई गलत सूचना दिइँदै आएको छ, जसप्रति उनले कडा आपत्ति जनाएकी छन्।
बुधबार बिहान रास्वपा जुम्लाले आयोजना गरेको पत्रकार सम्मेलनमा बोल्दै कठायतले शाहीले योजनाबद्ध ढंगले झुटा सूचना फैलाएर जनमतलाई भ्रममा पार्न खोजेको बताइन्।
“हलो र घण्टी एउटै हुन् भन्ने प्रचार खुलेआम भइरहेको छ,” उनले भनिन्, “यो सामान्य गल्ती होइन, मतदातालाई छल्ने गम्भीर षड्यन्त्र हो।” यस्ता गतिविधि निरन्तर भए कानुनी प्रक्रियामा जान बाध्य हुने चेतावनी पनि उनले दिइन्।
कठायतले स्पष्ट पार्दै भनिन्, रास्वपाको चुनाव चिन्ह घण्टी हो भने राप्रपाको चिन्ह हलो हो। फरक–फरक दल र चिन्हलाई एउटै भनेर प्रचार गर्नु निर्वाचन आचारसंहिता विपरीत मात्र नभई नागरिकको मताधिकारमाथि सीधा आक्रमण भएको उनको भनाइ थियो।
आफूहरू काठमाडौं फर्किएपछि चुनाव छाडेको भन्ने आरोपलाई उनले निराधार भन्दै खण्डन गरिन्। “काठमाडौं पुगेको दिनदेखि नै हामी सक्रिय रूपमा चुनावी अभियानमै छौं,” उनले भनिन्, “बालेन शाहलाई जुम्ला आउन मैले रोकेको भन्ने कुरा पनि पूर्णतः असत्य हो।”
पत्रकार सम्मेलनमा कठायतले शाहीको राजनीतिक विगतप्रति संकेत गर्दै थप आलोचना गरिन्। उनले रास्वपाबाट टिकट मागी सुर्खेतबाट चुनाव लड्ने इच्छा देखाउने व्यक्ति अहिले रास्वपाकै विरुद्ध भ्रम फैलाइरहेको आरोप लगाइन्।
उनका अनुसार ठोस एजेण्डाको अभावमा जनतालाई झुटा प्रचारमा अल्झाउने प्रयास भइरहेको छ। “एजेण्डा सकिएपछि घण्टी र हलो एउटै हुन् भनेर भ्रम छर्नु कत्तिको नैतिक हो ?” भन्दै उनले प्रश्न गरिन्।
कठायतले फागुनको पहिलो सातामा रास्वपाका वरिष्ठ नेता बालेन शाह र पार्टी सभापति रवि लामिछाने जुम्ला आएर यथार्थ सार्वजनिक गर्ने दाबी समेत गरिन्। त्यसपछि ज्ञानेन्द्र शाहीको राजनीतिक अवस्थाको मूल्यांकन जनताले आफैं गर्ने उनको भनाइ थियो।
रास्वपा र राप्रपाबीच कुनै पनि प्रकारको गठबन्धन नहुने स्पष्ट पार्दै उनले भनिन्, “रास्वपा संविधानप्रति प्रतिबद्ध दल हो। समाप्त भइसकेको राजतन्त्रलाई समर्थन गर्ने शक्तिसँग हाम्रो सहकार्य सम्भव छैन।” गठबन्धनको चर्चा निराधार हल्ला मात्र भएको उनले बताइन्।
