जुम्लाको तातोपानी, चन्दननाथ, र पातरासी गाउँपालिकाका किसानहरु लिफ्ट मार्फत नदिको पानी पाखो जमिनमा ल्याएर मनग्य आम्दानी गर्न सफल भएका छन् । पहिला सिंचाईको अभावका कारण कृषि सम्बन्धीको विभिन्न समस्या भोक्दै आएका किसानहरु हिजोआज भनेको समयमा आफुले लगाएको फलफूल, तरकारी तथा अन्य अन्न बालीहरुमा सिंचाई गर्न पाउँदा खुशी भएको जुम्लाको तातोपानी गाउँपालिकाका किसानहरुले बताएका छन् ।
सिंचाईको सुविधा नभएको खेति योग्य जमिनको सिंचाई गर्नको लागि नदिबाट लिफ्ट सिंचाई गर्न शुरु भएपछि यहाँका महिलाहरुको कार्यबोझ कम हुनुका साथै सिंचाई पछि उत्पादन गरिएको स्याउ, ओखर आरु लगायतको फलफूल र तरकारी खेतिबाट राम्रो आम्दानी गर्न सफल भएको महिलाहरुले बताएका छन् । पहिला पहिला सिंचाई नहुँदा नदिबाट गाग्रीमा पानी बोकेर सिंचाई गर्दै आएका महिलाहरु विगत दुईवर्ष देखि यता भनेको समयमा सिंचाई गर्न पाउँदा खुशी भएका छन् ।
पहिला पहिला आकाशे पानीको भर पर्नु पर्ने र समयमा पानी नपरेपछि तिला नदिबाट आधा घण्टाको उकालो बाटो हिँडेर स्याउ लगायतका फलफूलको विरुवा सिंचाई गर्दै आएका महिलाहरु हिजो आज लिफ्ट मार्फत सिंचाई गरेर राम्रो उत्पादन गर्न पाउँदा खुशी लागेकोे तातोपानी गाउँपालिका ६ की राजकली विष्टले बताइन् । उनले भनिन्, सिंचाईको सुविधा भइसकेपछि उत्पादन गरेको तरकारी उक्त गाउँपािलकामा रहेका सामुदायिक विद्यालयसँग सम्पर्क गरेर बालबालिकाको दिवा खाजाको लागि प्रयोग गर्नुका साथै बचेको तरकारीहरु बजारमा लिएर बेच्दा भनेजस्तो आम्दानी गर्न सफल भएका छौँ ।
यस्तै सिंचाईको सुविधा भएपछि स्याउ, आरु ओखर लगायतको फलफूल र तरकारी खेतिबाट राम्रो उत्पादन लिन सफल भएको उक्त वडाकी अर्की किसान पवित्रा अधिकारी न्यौपानेले भनिन् । उनका अनुसार तरकारी खेति गर्न थालेपछि आफुलाई हिउँदमा समेत हरियो खान र बढी भएको बजारमा बेचेर आम्दानी गर्न सहज भएको छ ।
राजकली र पवित्रा मात्र होइन त्यो गाउँमा रहेका सबै महिलाको घरमा अहिले सिंचाइको सुविधा पुगेपछि हिउँदमा प्लाष्टिक टनेलमा हरियो सागपातको व्यवसायीक खेति हुन थालेको छ । वर्षातको समयमा मौसमी र हिउँदमा बेमौसमी तरकारी खेतिबाट राम्रो आम्दानी गर्न सहल भएका छन् ।
स्थानिय सरकार र केही दातृ निकायहरुको सहयोगमा लिफ्ट सिंचाई गर्न शुरु भएपछि स्याउ, आरु ओखर लगायतका फलफूलका विरुवा र तरकारी खेतिमा सिंचाई गरेर उत्पादन वृद्धि गर्न समेत सहयोग पुगेको जुम्लाको तातोपानी गाउँपालिकाका प्रमुख प्रशासकिय अधिकृत तिर्थ बहादुर कठायतले बताए । उनले भने तातोपानी गाउँपालिकाको समन्वयमा यू. एन. डी. पी, नर्वेजियन सरकारको सहयोगमा सञ्चालित रिराज परियोजनाको प्राविधिक सहयोग र आर्थिक सहयोगमा सिंचाइ सुविधा भएपछि महिलाहरुको कार्यबोझ समेतमा कमी आएको छ ।
जुम्लाको सिंचाई अभाव भएका स्थानिय तहहरुमा विद्युत र सोलारको प्रयोग गरेर लिफ्ट मार्फत नदिको पानी पाखो नजिनमा लिएर सिचाइ गर्न थालिएको छ । यसले गर्दा यहाँका महिलाहरुको कार्यबोझ कम हुनुका साथै सिंचाई सुविधा भएपछि गुणस्तरिय उत्पादनमा समेत टेवा पुगेको किसानहरुले बताएका छन् ।
