साउन १ जुम्ला
जुम्लाको पातारासी गाउँपालिका–५ स्थित तलि लोर्पमा स्थानीय स्तरमै आधारभुत स्वास्थ्य सेवा सुरु गरिएको छ । गाउँमै स्वास्थ्य सेवा उपलब्ध गराउने उद्देश्यले लोर्पमा दुई तल्ले पक्की भवन निर्माण गरी स्वास्थ्य इकाई सञ्चालनमा ल्याइएको हो ।
वडाध्यक्ष दत्तबहादुर बुढाका अनुसार, गत वर्ष ४० लाख रुपैयाँको लागतमा भुइँतला र चालु आर्थिक वर्षमा ३७ लाख रुपैयाँको लागतमा पहिलो तला निर्माण गरिएको हो । संघीय सरकारको ७७ लाख रुपैयाँको सहयोगमा निर्माण गरिएको १८ कोठे स्वास्थ्य इकाई सञ्चालनमा आएपछि डिल्लीचौर स्वास्थ्य चौकी वा सदरमुकाम पुग्नुपर्ने बाध्यता हटेको वडाध्यक्ष बुढाले जानकारी दिनुभयो ।
स्वास्थ्य सेवा पहुँचमा आएपछि लोर्प गाउँका ६६९ घरधुरी लाभान्वित हुने अपेक्षा गरिएको छ । स्वास्थ्य सेवा गाउँमै सुरु भएपछि लोर्प गाउँका स्थानीयवासी खुसी भएका छन् । पहिले डिल्लीचौर वा सदरमुकामसम्म घण्टौं पैदल हिँडेर उपचारका लागि जानुपर्ने बाध्यता रहेकोमा अब घर नजिकै सेवा पाउँदा राहत महसुस भएको उनीहरूको भनाइ छ ।
गाउँमै स्वास्थ्य सेवा सुरु भएपछि लोर्पका स्थानीयवासी उत्साहित भएका छन् । स्वास्थ्य संस्था निर्माणसँगै अब सामान्य उपचारका लागि टाढासम्म जानु नपर्ने भएकोले उनीहरूमा सेवा प्रतिको भरोसा र चासो बढेको देखिएको छ ।
