साउन १२ जुम्ला
स्याउ बीमा रकमको माग दाबी गर्दै किसानहरूले शिखर इन्स्योरेन्सको जुम्ला शाखामा लगाएको ताला खुलेको छ । किसान राज बहादुर खत्रीका अनुसार, साउन २ गते लगाइएको ताला सहमतिमा खोलिएको बताउनु भयो । स्याउ बीमा गरेका किसानहरूले मौसमजन्य क्षतिको क्षतिपूर्तिका लागि पटक–पटक इन्स्योरेन्स कम्पनीलाई माग गर्दै आए पनि रकम भुक्तानी नभएको भन्दै उनीहरूले ताला लगाएका थिए ।
आन्दोलन चर्किएपछि सरोकारवालाबीच संवाद भएपछि ताला खोलेको किसानहरूको भनाइ छ । आन्दोलनमा उत्रिएका किसान र शिखर इन्स्योरेन्स कम्पनी बीच ११ बुँदे सहमति भएपछि ताला खुलेको उहाँको भनाइ छ । किसानका मागहरु पुरा हुने बाटो खुलेको भन्दै किसानहरु खुसि भएका छन् ।
किसान महासंघका केन्द्रीय सदस्य तथा आन्दोलन संयोजक खडग बहादुर सेजुवालका अनुसार किसानहरुले स्याउ उत्पादनको बिमाको समयमै क्षतिपूर्ति नपाएको गुनासो गर्दै आन्दोलनमा उत्रिएको बताउनु भयो । कम्पनीले प्रक्रियागत कमजोरीको स्वीकार गर्दै सहमतिमा आएको उहाँको भनाइ छ ।
शिखर इन्स्योरेन्सको तर्फबाट महाप्रबन्धक उदित प्रसाद काफ्ले, नायव प्रबन्धक सार्थक राज पाण्डे, प्रदेश प्रमुख गणेश प्रसाद जोशी, कर्णाली इञ्चार्ज ऋषिराम पाण्डे र जुम्ला शाखा प्रमुख लक्ष्मण उपाध्याय काफ्ले वार्तामा सहभागी हुनुहुन्थ्यो । किसानका तर्फबाट संयोजक सेजुवाल सहित महानन्द चौलागाई, राजबहादुर खत्री, मन्न बहादुर थापा र भैरव बहादुर धराला प्रतिनिधि हुनुहुन्थ्यो ।
सहमतिमा बीमा दाबीका लागि किसानहरुले लालपुर्जाको फोटोकपी, नागरिकताको फोटोकपी, अन्य स्वामित्व कागजात, लिज सम्झौता, नाता प्रमाण र चेकको स्पष्ट प्रति अनिवार्य पेश गर्नु पर्ने छ । यस्तै, प्रमाण उपलब्ध गराएको कम्तीमा ७ दिनभित्र बिमा दाबी रकम भुक्तानी गरिने छ ।
किसानले प्रतिवेदन प्रस्तुत गरेपछि नगद भुक्तानीको व्यवस्था गर्ने सहमति भएको छ । यसैगरी, पुनः मूल्याङ्कनको आधारमा मात्र भुक्तानी गरिने लगायतका ११ बुँदामा सहमति भएको छ ।
