ठेकेदार सम्पर्क विहीन
साउन ३ जुम्ला
तिला गाउँपालिका–४ नुवाकोटका दलबहादुर नेपाली सहितका कामदारहरूले आफुहरूले गरेको श्रमको ज्याला अहिलेसम्म नपाएको गुनासो गरेका छन् । कामदारहरूका अनुसार उनीहरूले डोल्पा जिल्लाको जगदुल्ला गाउँपालिका–२ झ्याकोटमा विद्यालय भवन निर्माण र जुम्लाको सिँजा गाउँपालिकाको जाँचमा खानेपानी योजना निर्माण कार्य गरेका थिए ।
तर, त्यसको पारिश्रमिक अहिलेसम्म नपाएको उनीहरूको आरोप छ । कामदार दलबहादुर नेपालीका अनुसार डोल्पामा २०८० सालमा गरिएको कामको साढे ३ लाख रुपैयाँ र सिँजामा २०८१ सालमा गरिएको कामको ६ लाख ९५ हजार रुपैयाँ ठेकेदारले अहिलेसम्म नबुझाएको बताउनु भयो ।
“डोल्पामा ४० जना र सिँजामा ३१ जना गरी कुल ७१ कामदारले पारिश्रमिक पाउन बाँकी रहेको नेपालीको भनाइ छ । उहाँका अनुसार जाजरकोटका राजेन्द्र रसाइली नाम गरेका ठेकेदारले दुईवटै स्थानमा काम गराएर पैसा नदिई हाल सम्पर्कविहीन भएको आरोप लगाउनु भयो । कामदारहरूले सम्बन्धित निकायसँग न्याय माग्दै ठेकेदार विरुद्ध छानबिन र कारबाहीको माग गरेका छन् ।
श्रमको मूल्य नपाएर अन्यायमा परेका कामदारहरूले पत्रकारहरू मार्फत न्याय खोज्ने प्रयास थालेका छन् । काम गरेर पनि पारिश्रमिक नपाउनु मजदुर माथिको अन्याय भएको दलबहादुर नेपालीको भनाइ छ । उहाँले ठेकेदार विरुद्ध सम्बन्धित निकायमा आवाज उठाउन पत्रकारहरूलाई सहयोग गर्न आग्रह गर्नु भएको छ ।
कामदारहरूले ठेकेदारलाई कानुनी दायरामा ल्याउन माग गरेका छन् । ठेकेदार रसाइली हाल सम्पर्कविहीन रहेको कामदारहरूको बताएका छन् । “फोन गर्दा पनि उठाउँदैनन्, पैसा नदिई भाग्नु भएको छ” दलबहादुर नेपालीले बताउनु भयो । उहाँले थप्नुभयो, श्रम गरेर पेट पाल्ने मजदुरमाथि अन्याय भएको छ । यस्तो अवस्थाको विरुद्धमा पत्रकार, नागरिक समाज र राज्यले आवाज उठाउई दिनु पर्ने उहाँको भनाइ छ ।
