असोज २२ जुम्ला
जुम्लाको ऐतिहासिक सिँजा क्षेत्रमा अहिलेसम्म इन्टरनेट सेवा पुग्न सकेको छैन् । इन्टरनेट सेवा नहुँदा स्थानीय समुदाय, विद्यालय तथा वडा कार्यालयहरूले दैनिक प्रशासनिक र शैक्षिक कार्य गर्न समस्या भोगिरहेका छन् । स्थानीयले फोन तथा इन्टरनेट दुवै सेवामा समस्या हुने गरेका बताएका छन् । विद्यालयहरूले अनलाइन फर्म भर्ने, शैक्षिक विवरण पठाउने जस्ता काममा कठिनाइ झेल्नु परेको छ ।
त्यस्तै, वडा कार्यालयहरूले पनि विभिन्न पत्राचार र अनलाइन प्रणालीमार्फत गरिने सरकारी काम गर्न नपाउँदा सेवा प्रवाह प्रभावित भएको बताएका छन् । शान्ति जन आधारभुत विद्यालयका प्रधानाध्यापक प्रमान बहादुर रोकायाले गाउँमा इन्टरनेट त के मोबाईलमा नेटवर्कको सिग्नल समेत स्थिर नभएको बताउनु भयो । उहाँले भन्नुभयो, सामान्य फोन गर्न पनि निकै समस्या हुन्छ । कहिलेकाँही फोन लागे पनि आवाज काटिने वा नबुझिने हुन्छ ।
प्रधानाध्यापक रोकायाले नेताहरूले इन्टरनेट सेवा ल्याउने बाचा धेरै गरे पनि अहिलेसम्म त्यो केवल बाचामै सिमित रहेको बताउनु भयो । उहाँका अनुसार विद्यालयका अनलाइन कार्यक्रम र शैक्षिक रिपोर्टिङ ठप्प अवस्थामा छन् । स्थानीयवासीले पनि सञ्चार सेवाको अभावमा सूचना आदान–प्रदान र आपतकालिन सम्पर्कमा कठिनाइ भएको गुनासो गरेका छन् । उनीहरूले सम्बन्धित निकायको ध्यानाकर्षण गराउँदै चाँडै इन्टरनेट र स्थिर मोबाइल सेवा विस्तार गर्न माग गरेका छन् ।
सिँजा गाउँपालिका–६ का वडाध्यक्ष लाल बहादुर बुढाले इन्टरनेट खोज्दै जनताको सेवा दिन नराकोटबजार र जुम्ला बजार धाउनु पर्ने अवस्था रहेको सुनाउनु भयो । वडा कार्यालयमा नेटवर्क आएपनि काम गर्दैन् । कहिलेकाँही नेटवर्क आउने ठाउँमा पुगेर मात्रै अनलाइन काम गर्नु पर्ने अवस्था रहेको बुढाको भनाइ छ । स्थानीय सर्जुन रोकायाका अनुसार सिँजाको माईथाप्ला टावर नै स्थानीयका लागि समस्या बनेको बताउनु भयो ।
उहाँले भन्नुभयो, फोन राम्रोसँग चल्दैन, नेटवर्क पनि आउँदैन् । सरकारी निकायले सिँजालाई प्रविधिको दृष्टिले पछाडि पारेका छन् । जनप्रतिनिधिहरुलाई इन्टरनेट सेवा सञ्चालनका लागि पहल गर्न आग्रह गर्दा पनि सुनुवाइ नभएको उहाँको भनाइ छ । इन्टरनेट नहुँदा नागरिकता, सामाजिक सुरक्षा भत्ता, जन्मदर्ता लगायतका अनलाइन प्रणालीबाट हुने कामहरुमा ढिलो भइरहेको छ ।
नेपाल टेलिकम जुम्ला शाखाका प्रमुख नरहरि नेपालले सिँजामा इन्टरनेट र नेटवर्कको समस्याका बारेमा औपचारिक रूपमा जानकारी नभएको बताउनु भयो । सिँजा क्षेत्रमा देखिएको समस्या समाधानका लागि पहल गर्ने उहाँको भनाइ छ । डिजिटल नेपाल अभियानको चर्चा चलि रहेका बेला सिँजाका जनताले अझै पनि नेटवर्कमा समस्या भोग्नु पर्ने बाध्यता रहेको छ ।
डिजिटल नेपालको सपना पुरा हुन हिमाली तथा पहाडी क्षेत्रका बस्तिहरूमा इन्टरनेट सेवा स्थायी रूपमा पुग्न जरुरीे छ । स्थानीयहरूले सम्बन्धित निकायको ध्यानाकर्षण गराउँदै चाँडै इन्टरनेट सेवा विस्तार गर्न माग गरेका छन् ।
