जुम्ला।सिंजा गाउँपालिकाले आर्थिक वर्ष २०८१/८२ को समीक्षा गर्दै सार्वजनिक सुनुवाइ कार्यक्रम सम्पन्न भएको छ। आइतबार सम्पन्न कार्यक्रममा गाउँपालिकाले एक वर्षभित्रका योजना, कार्यक्रम, खर्च, आय–व्यय र उपलब्धिहरू सर्वसाधारण सामु राख्दै पारदर्शिताको अभ्यास गरेको हो।
गाउँपालिकाका प्रमुख प्रशासकीय अधिकृत टेकबहादुर शाहीका अनुसार, सो आर्थिक वर्षका लागि गाउँपालिकाले ३८ करोड ४६ लाख रुपैयाँको अनुमानित बजेट ल्याएको थियो। सो मध्ये ३५ करोड ८९ लाख ४ हजार रुपैयाँ खर्च भई कुल १५८ योजनामध्ये १३५ योजना सम्पन्न भएका छन्। ठेक्का प्रणालीबाट सञ्चालन गरिएका ६ योजनामध्ये गाउँपालिकाको प्रशासकीय भवनको रनिङ बिल मात्र भुक्तानी भएको उनले जानकारी दिए। गाउँपालिकाले सो अवधिमा २६ लाख ६४ हजार रुपैयाँ आन्तरिक राजस्व संकलन गरेको पनि उनले बताए।
कार्यक्रमको उद्घाटन गाउँपालिका अध्यक्ष पूर्णप्रसाद धितालले गरेका थिए। उनले सार्वजनिक सुनुवाइमार्फत नागरिकको सुझाव र गुनासालाई नीति तथा योजनामा रूपान्तरण गर्ने प्रतिबद्धता जनाउँदै भने, “सार्वजनिक उत्तरदायित्व र जनसहभागिता हाम्रो प्राथमिकता हो। विकासका हरेक कार्यक्रम वडास्तरमै पारदर्शी रूपमा कार्यान्वयन गरिनेछ।”
गाउँपालिका प्रवक्ता तिर्थ वडका अनुसार, यस वर्षको सार्वजनिक सुनुवाइ सेवा प्रदायक संस्थामार्फत सम्पन्न गरिएको हो। यसले सुशासन, पारदर्शिता र विश्वसनीयतामा थप बल दिने उद्देश्य राखेको उनले बताए।
सुनुवाइ कार्यक्रममा प्रमुख प्रशासकीय अधिकृत शाहीले वार्षिक प्रतिवेदन प्रस्तुत गरेपछि सहभागी नागरिक, राजनीतिक दलका प्रतिनिधि, शिक्षक, महिला समूह, र सरोकारवालाबीच खुला छलफल र प्रश्नोत्तर सत्र भएको थियो। कार्यक्रममा सहभागीहरूले स्वास्थ्य, शिक्षा, कृषि, खानेपानी र पूर्वाधार विकासका क्षेत्रमा अझ प्रभावकारी कार्यक्रम ल्याउन सुझाव दिएका थिए।
सिंजा गाउँपालिकाले हरेक वर्ष विकास, सुशासन र सेवा प्रवाहमा पारदर्शिता कायम गर्न यस्ता सार्वजनिक सुनुवाइ कार्यक्रम आयोजना गर्दै आएको छ। यस वर्षको कार्यक्रमको सहजीकरण तिला मल्टिपर्पोज मिडिया प्रालिले गरेको हो।
