असोज २९ जुम्ला
जेनजी आन्दोलन पछि जुम्लाको गुठिचौर गाउँपालिकाले ‘शुसासन पालिका अभियान’ सुरु गरेको छ । पालिकामा हुने अनियमितता नियन्त्रण, सवारीसाधनको दुरुपयोग रोकथाम, भ्रमण भत्तामा अनुशासन कायम र अध्यक्ष स्वयम्ले पनि सवारीसाधन प्रयोग नगर्ने निर्णयसहित अभियान थालिएको हो । गाउँपालिकाका अध्यक्ष दानबहादुर बुढाका अनुसार कार्यालयका सवारीसाधनहरू अब व्यक्तिगत प्रयोजनका लागि प्रयोग गर्न पाइने छैन् ।
कर्मचारीहरूले कार्यालय समय बाहेक घरमा सवारीसाधन प्रयोग गर्दै आएको पाइएकाले त्यसमा रोक लगाइएको हो । अध्यक्ष बुढाले सबै कर्मचारीलाई विहान १० बजेदेखि साँझ ४ बजेसम्म कार्यालयमा उपस्थित रहि जनसेवामा समर्पित रहन निर्देशन दिनु भएको छ । कार्यालयको काम सकिएपछि कुनै हालतमा सरकारी सवारीसाधन व्यक्तिगत प्रयोजनमा प्रयोग गर्न प्रतिबन्ध गरिने उहाँको भनाइ छ । कार्यालयको काम बाँहेक व्यक्तिगत प्रयोजनका लागि सवारी साधान प्रयोगमा पूर्ण प्रतिबन्ध लगाईने छ । गाउँपालिकामा घरबाट आउन जान सहज मानेको खण्डमा जागिरबाट बिदाई हुन उहाँले सुझाव दिनु भएको छ ।
गाउँपालिकाले आवश्यक परे आवासको व्यवस्था समेत गर्ने जनाएको छ । आवासमा बस्न नचाहने कर्मचारीले बजारमा सवारीसाधन राखी साझा रूपमा एउटै साधन प्रयोग गर्नुपर्ने व्यवस्था गरिने पनि अध्यक्ष बुढाले बताउनु भयो । गाउँपालिकामा आयोजित पत्रकार सम्मेलनमार्फत अध्यक्ष बुढाले करारका १९ जना कर्मचारी असोज ३० गतेदेखि हाजिर नहुने गरी पत्राचार गरिने जानकारी दिएका छन् ।
अर्थ मन्त्रालयले गरेको परिपत्र र कर्णाली प्रदेश स्थानीय सेवा (गठन तथा सञ्चालन) ऐन, २०८१ बमोजिम कुनै पनि व्यक्तिलाई ज्यालादारी वा करारमा नियुक्त गर्न नपाइने व्यवस्था विपरीत नियुक्त नगर्न प्रस्ट उल्लेख छ । उक्त ऐनले जसले नियुक्ति गरेको हो, उही व्यक्तिले पाएको तलब तथा अन्य सेवा सुविधा नियुक्ति दिने पदाधिकारीबाट सरकारी बाँकी सरह असुलउपर गरिने व्यवस्था गरेको छ । सोहि आधारमा गाउँपालिकामा रहेका करारका कर्मचारीलाई हटाईने उहाँको भनाइ छ ।
साथै स्थानीय सरकार सञ्चालन ऐन, २०७४ मा तोकिएका पदहरू तथा संघीय÷प्रदेश सरकारबाट बजेट सुनिश्चित भएका करार कर्मचारीबाहेक आर्थिक वर्ष २०८१÷०८२ को असार मसान्तसम्म करार वा ज्यालादारीमा सम्झौता भई कार्यरत कर्मचारीलाई साउन १ गतेदेखि लागु हुने गरी हाजिर नगराउन सार्वजनिक सूचना नै जारी गरेको थियो ।
गुठिचौर गाउँपालिकाले सुरू गरेको प्याराग्लाईडिङ महोत्सवले कुनै पनि हालतमा नरोक्ने उहाँका भनाइ छ । अख्तियारमा पुगेर जवाफ दिनु परे पनि प्याराग्लाईडिङ महोत्सव प्रत्येक वर्ष संचालन हुने अध्यक्ष बुढाले बताउनु भयो ।
