जुम्ला । डोल्पा जिल्लाको काइके गाउँपालिका–५ स्थित सिमओडारको खोला किनारमा अज्ञात पुरुषको शव फेला परेको छ। मृतकको उमेर करिब ४० वर्षको भएको अनुमान गरिएको छ।
जिल्ला प्रहरी कार्यालय डोल्पाका प्रहरी नायब उपरीक्षक (डिएसपी) रुकबहादुर खड्काका अनुसार मृतकको परिचय हालसम्म खुल्न सकेको छैन। उनले घटनास्थलको अवस्थाले मृतक भिरबाट खसेर खोलामा परेको देखिएको भए पनि यसलाई निश्चित कारण भन्न नसकिने बताए।
स्थानीय बासिन्दाले सोमबार बिहान खोलाको किनारमा घोप्टो अवस्थामा शव देखेपछि प्रहरीलाई खबर गरेका थिए। त्यसपछि इलाका प्रहरी कार्यालय छार्काबाट प्रहरी सहायक निरीक्षक विष्णु चौधरीको नेतृत्वमा आठ जनाको टोली तत्काल घटनास्थल पुगेको थियो। टोलीले प्रारम्भिक मुचुल्का तयार गरी शवलाई उद्धार गरेर जिल्ला अस्पताल दुनै पठाएको छ।
प्रहरीले शवको अवस्था र वरिपरि रहेको भौगोलिक बनावट अध्ययन गर्दा मृतक भिरबाट लडेर मृत्यु भएको हुनसक्ने अनुमान गरेको छ। तर मृत्युको वास्तविक कारण थाहा पाउनका लागि पोस्टमार्टम रिपोर्टको प्रतीक्षा गर्नुपर्ने डिएसपी खड्काले जानकारी दिए ।
मृतकको साथमा कुनै परिचयपत्र वा सामान नभएकाले उनको परिचय अझै खुलेको छैन। प्रहरीका अनुसार मृतक स्थानीय वा बाहिरका व्यक्ति हुनसक्ने सम्भावना रहेको छ। मृतकको पहिचान पत्ता लगाउन स्थानीयवासीसँग समन्वय गर्दै अनुसन्धान अगाडि बढाइएको प्रहरीले जनाएको छ।
घटना रहस्यमय देखिएकोले प्रहरी अहिले विस्तृत अनुसन्धानमा जुटेको छ। पोस्टमार्टमपछि प्राप्त विवरणले मृत्युको वास्तविक कारण र अन्य पक्ष स्पष्ट पार्ने अपेक्षागरिएको छ।
