संविधान संशोधन बहसपत्र तयार गर्ने कार्यदलको पहिलो बैठक आज बस्ने भएको छ । बैठक प्रधानमन्त्री तथा मन्त्रिपरिषद्को कार्यालयमा दिउँसो ३ बजे बस्न लागेको हो ।
प्रधानमन्त्री बालेन्द्र शाहका प्रमुख राजनीतिक सल्लाहकार असिम शाहको संयोजकत्वमा ‘संविधान संशोधन बहसपत्र तयार गर्ने कार्यदल–२०८२’ गठन भएपछि पहिलो बैठक आह्वान भएको हो ।
कार्यदलमा राष्ट्रिय स्वतन्त्र पार्टी (रास्वपा)बाट मोहन आचार्य, नेपाल कम्युनिष्ट पार्टी (एमाले)का संविधान सभा सदस्य डा. भीष्मनाथ अधिकारी, नेपाल कम्युनिष्ट पार्टीका संविधान सभाका सदस्य एवम् पूर्व कानूनमन्त्री देव प्रसाद गुरुङ, राष्ट्रिय प्रजातन्त्र पार्टीका संसदीय दलका नेता ज्ञानेन्द्र शाही र राष्ट्रिय जनमोर्चाका तर्फबाट महासचिव मनोज भट्ट सदस्य छन् ।
कार्यदलमा नेपाली कांग्रेस, श्रम संस्कृति पार्टी, जनता समाजवादी पार्टी, नेपाल र लोकतान्त्रिक समाजवादी पार्टी, नेपालले प्रतिनिधि तोक्न बाँकी छ । दलहरूले कार्यदल सदस्यको नाम सम्भवतः आजै टुङ्गो लगाएर बैठकमा सहभागी हुन सक्ने बताइएको छ ।
कार्यदलमा प्रधानमन्त्री तथा मन्त्रिपरिषद्को कार्यालयका कानून सचिव पुष्कर सापकोटा र नेपाल कानून आयोगकी सचिव इन्दिरा दाहाल सदस्यका रूपमा छन् । कार्यदलको सदस्य सचिव भने प्रधानमन्त्री तथा मन्त्रिपरिषद्को कार्यालय, कानून तथा फैसला कार्यान्वयन महाशाखा प्रमुख लिलाधर सुवेदी छन् ।
स्रोत रातोपाटी
