असोज २४ जुम्ला
जुम्लामा हवाई टिकट वितरण प्रणाली अस्वस्थ बनेको छ । एयरलाईन्सका कर्मचारीहरूले खल्तीबाट त टिकट वितरण गर्दै आएका छन् । जसका कारण सर्वसाधारणले सहज रूपमा टिकट पाउने अवस्था छैन् । चिनजान भएका, पहुँच भएका र निजी एयरलाईन्सका कर्मचारीका फोन नम्बर भएकाहरूले मात्र टिकट पाउने गरेका छन् । आम नागरिकलाई भने टिकट किन्न निकै समस्या हुने गरेको छ । स्थानीय यात्रुहरूका अनुसार टिकट खरिदका लागि पटक–पटक प्रयास गर्दा पनि ठुला मान्छे वा दलाल मार्फत मात्रै टिकट उपलब्ध हुने गरेको गुनासो छ ।
विगतदेखि जुम्लामा सञ्चालनमा रहेका निजि एयरलाईन्स कम्पनीहरूले आफ्नो सञ्जालका आधारमा टिकट वितरण गर्दै आएका छन् । सैद्धान्तिक रूपमा खुला प्रणालीमा टिकट उपलब्ध हुने भनिए पनि, व्यवहारमा भने एयरलाईन्सका केही कर्मचारीको खल्तीबाट टिकट वितरण गर्दै आएका छन् ।
एयरलाईन्सका कार्यालयहरु भएपनि बन्द रहने गरेका छन् । चिनजान र फोनका आधारमा टिकट वितरण गर्ने चलन जुम्लामा चलि रहेको छ । टिकट छैन भन्छन्, तर अर्को मान्छेलाई पाँच मिनेटमै दिन्छन स्थानीय व्यवसायी गणेश महतले भन्नुभयो । उहाँको भनाइमा, एयरलाईन्सका कर्मचारीसँग व्यक्तिगत सम्बन्ध भएका वा ठुला व्यक्तिहरूको सिफारिस बोकेकाले सहजै टिकट पाउने गरेका छन् । सर्वसाधारण यात्रुहरूलाई पुरा बुक भइसक्यो भनेर फर्काइन्छ ।
तर त्यही जहाजमा पछि गएर हेर्दा खाली सिट देखिन्छ । पारदर्शिता र जवाफदेहिताको कमीले यसको छवि पनि निजी कम्पनीभन्दा फरक छैन । कति पटक स्थानीय प्रशासन, नागरिक समाज र जनप्रतिनिधिहरूले टिकट वितरण प्रणाली सुधार्न छलफल गरे । तर प्रत्येक छलफलको परिणाम शुन्य देखिएको छ । टकट वितरण प्रणालीमा सुधार ल्याउनका लागि जिल्ला प्रशासन कार्यालय जुम्लामा धेरैपटक बैठक र छलफलहरू भएका छन् ।
स्थानीय प्रशासन, नागरिक समाज र जनप्रतिनिधिहरूले पनि पारदर्शी प्रणालीको माग गर्दै प्रस्तावहरू अघि सारेका थिए । तर ती सबै छलफलहरू कागजमै सीमित भएका छन् । जुम्लाको आकाशमा जहाजहरू उडिरहेका छन् । हाल जुम्लामा तारा एयर, सिता एयर, समिट एयर र नेपाल वायुसेवा निगमका जहाजले उडान भर्दै आएका छन् । तर, वितरण प्रणाली पारदर्शी नहुँदा हवाई सेवामा सर्वसाधारणको पहुँच दिनानुदिन घट्दै गएको छ ।
