वैशाख ११ जुम्ला
आयुर्वेद स्वास्थ्य केन्द्र बोहोरागाउँ जुम्लाले पाँच वर्ष मुनिका बालबालिकालाई लक्षित गर्दै स्वर्ण विन्दु प्राशन कार्यक्रम सम्पन्न गरेको छ । हरेक महिनाको पुष्य नक्षेत्रका दिन सञ्चालन हुने यस कार्यक्रम अन्तर्गत वैशाख ११ गते पनि ठुलो संख्यामा बालबालिकालाई स्वर्ण विन्दु प्राशन गराइएको हो । आयुर्वेद स्वास्थ्य केन्द्र जुम्लाका सूचना अधिकारी नन्द प्रसाद न्यौपानेका अनुसार स्वर्ण विन्दु प्राशन आयुर्वेदिक दृष्टिकोणले बालबालिकाको शारीरिक, मानसिक तथा बौद्धिक विकासमा महत्वपूर्ण योगदान गर्ने परम्परागत विधि हो ।
उहाँले यसले बालबालिकाको रोग प्रतिरोधात्मक क्षमता वृद्धि गर्ने, पाचन शक्ति सुधार गर्ने, स्मरण शक्ति तथा एकाग्रता बढाउने, साथै समग्र स्वास्थ्य सुदृढ बनाउन मद्दत गर्ने बताउनु भयो । उहाँका अनुसार स्वर्ण विन्दु प्राशनलाई नियमित रूपमा हरेक महिनाको पुष्य नक्षेत्रका दिन सञ्चालन गर्ने तालिका अनुसार कार्यक्रम सञ्चालन भएको बताउनु भयो । यस कार्यक्रम मार्फत अभिभावकहरूलाई बालबालिकाको स्वास्थ्य, पोषण र आयुर्वेदिक उपचार पद्धतिबारे समेत सचेत गराउने काम भइरहेको छ ।
यस पटकको कार्यक्रम बोहोरागाउँस्थित आयुर्वेद स्वास्थ्य केन्द्रमा उत्साहपूर्वक सम्पन्न भएको हो । कार्यक्रममा करिब ९ सय ६० भन्दा बढी बालबालिकाले स्वर्ण विन्दु प्राशन गरेका छन् । कार्यक्रमलाई प्रभावकारी बनाउन स्थानीय तह, स्वास्थ्यकर्मी तथा अभिभावकहरूको सहकार्य महत्वपूर्ण रहेको जनाइएको छ । आयुर्वेद स्वास्थ्य केन्द्रका अनुसार यस्तो कार्यक्रमले ग्रामीण क्षेत्रमा बालबालिकाको स्वास्थ्य सुधारमा दीर्घकालीन सकारात्मक प्रभाव पार्ने अपेक्षा गरिएको छ ।
यो कार्यक्रम कर्णाली प्रदेश अन्तर्गत दैलेख, सुर्खेत र जुम्ला जिल्लामा निरन्तर रूपमा सञ्चालन हुँदै आएको छ । आयुर्वेद स्वास्थ्य प्रवद्र्धन तथा परम्परागत उपचार पद्धतिलाई समुदायस्तरसम्म पु¥याउने उद्देश्यले कार्यक्रमलाई अझ विस्तार गर्ने योजना रहेको पनि केन्द्रले जनाएको छ ।
