चैत १४ जुम्ला
नेकपा एमाले अध्यक्ष तथा पूर्वप्रधानमन्त्री केपी शर्मा ओलिको रिहाइको माग गर्दै जुम्लामा राँके जुलुस निकालिएको छ । नेकपा एमाले निकटका युवाहरूले प्रदर्शन गर्दै पूर्वप्रधानमन्त्री ओलीलाई तत्काल रिहा गर्न माग गरेका हुन् । प्रदर्शनकारीहरूले बालेन शाह नेतृत्वको सरकारको विरोध गर्दै प्रधानमन्त्री शाह र गृहमन्त्री सुदन गुरुङको राजीनामा समेत माग गरेका छन् । जुलुसका क्रममा ओलीलाई रिहा गर, सरकारको निर्णय खारेज गर जस्ता नाराबाजी गरिएको थियो ।
सरकारले भदौ २३ र २४ गतेको घटनासम्बन्धी छानबिनका लागि गठित कार्की आयोगको प्रतिवेदन कार्यान्वयन गर्ने निर्णय गर्दै पूर्वप्रधानमन्त्री केपी शर्मा ओली र गृहमन्त्री रमेश लेखक विरुद्ध कारबाही प्रक्रिया अघि बढाउने भन्दै प्रहरीले नियन्त्रणमा लिएको छ । तर आयोगको प्रतिवेदन पूर्ण नभएको अवस्थामा गरिएको उक्त निर्णय राजनीतिक प्रतिशोध भएको एमालेको आरोप छ । यसै विषयलाई लिएर नेकपा एमालेले देशभर विरोध प्रदर्शन आयोजना गरेको छ । जस अन्तर्गत जुम्लामा पनि राँके जुलुस निकालिएको हो ।
