जुम्ला । कर्णालीको दुर्गम भूगोलमै प्रधानमन्त्रीको आकस्मिक उपस्थितिले जुम्ला यतिबेला राजनीतिक मात्र होइन, शैक्षिक हिसाबले पनि चर्चाको केन्द्र बनेको छ । प्रधानमन्त्री सुशीला कार्कीले बिहीबार जुम्लास्थित ऐतिहासिक कर्णाली प्राविधिक शिक्षालयको अवलोकन गर्दै यहाँका सम्भावना र चुनौतीबारे प्रत्यक्ष जानकारी लिएकी छन् ।
सुर्खेतबाट रारा ताल हुँदै जुम्ला आइपुगेकी प्रधानमन्त्री कार्कीले सदरमुकाम खलंगाको उत्तरी क्षेत्रमा रहेको शिक्षालय पुगेर प्राविधिक शिक्षाको अवस्था, पूर्वाधार विकास र दक्ष जनशक्ति उत्पादनको अवस्थाबारे चासो व्यक्त गरिन् ।
प्रधानमन्त्रीको भ्रमणलाई लक्षित गर्दै प्रमुख जिल्ला अधिकारी दीपक पौडेलको समन्वयमा नम्बर २४ बाहिनी अड्डाले सुरक्षा व्यवस्था कडा बनाएको थियो । यसैक्रममा शिक्षालय नजिकै निर्माणाधीन १ मेगावाट क्षमताको सौर्य ऊर्जा आयोजनाको समेत निरीक्षण गरिएको छ, जसले भविष्यमा ऊर्जा आपूर्तिमा सुधार ल्याउने अपेक्षा गरिएको छ ।
वि.सं. २०३७ सालमा स्थापना भएको कर्णाली प्राविधिक शिक्षालय कर्णाली क्षेत्रकै मात्र नभई देशकै महत्वपूर्ण प्राविधिक शिक्षालयका रूपमा परिचित छ । यहाँ कर्णालीका १० जिल्लासहित विभिन्न स्थानका हजारौं विद्यार्थी अध्ययनरत छन् भने हालसम्म ४ हजारभन्दा बढी दक्ष जनशक्ति उत्पादन भइसकेको छ ।
यद्यपि, यस्तो महत्वपूर्ण संस्था राज्यको प्राथमिकतामा नपरेको भन्दै यसको स्तरोन्नतिमा ढिलाइ भएको स्थानीयको गुनासो छ । प्रधानमन्त्रीको यस अवलोकनपछि शिक्षालयको विकास, पूर्वाधार विस्तार र गुणस्तर सुधारका विषय अब राष्ट्रिय प्राथमिकतामा पर्ने अपेक्षा गरिएको छ ।
अवलोकनपछि प्रधानमन्त्री कार्की केही समयका लागि बाहिनी अड्डामा विश्राम गरिरहेकी छन् । भ्रमण औपचारिकभन्दा अनौपचारिक ढंगले गरिएको हुँदा ठूलो सार्वजनिक कार्यक्रम राखिएको छैन । प्रमुख जिल्ला अधिकारी पौडेलका अनुसार प्रधानमन्त्रीको आज राति जुम्लामै बस्ने कार्यक्रम छ भने भोलि बिहान चन्दननाथ–भैरवनाथ मन्दिर दर्शन गर्ने प्रारम्भिक योजना रहेको छ । त्यसपछि उहाँ जुम्लाबाट फर्किने कार्यक्रम रहेको छ ।
