वैशाख २३ जुम्ला
सातौँ संस्करणको जुम्ला–रारा अल्ट्रा म्याराथनको ट्रफी र मेडल सार्वजनिक गरिएको छ । वैशाख २६ गते हुने प्रतियोगिताका लागि जुम्लाका प्रमुख जिल्ला अधिकारी दीपक पौडेल र ओलम्पियन तथा एभरेष्ट म्याराथन ह्याट्रिक विजेता धावक हरीबहादुर रोकायाले ट्रफी र मेडल सार्वजनिक गरेका हुन् । कर्णाली खेलकुद क्लब जुम्लाका अनुसार प्रतियोगितामा नेपाल सहित भारत, मन्जु श्री ट्रेल रेसका विजयी खेलाडि, इटाली र फ्रान्सका खेलाडीहरूको सहभागिता रहनेछ भने करिब १ हजार खेलाडी सहभागी हुने अपेक्षा गरिएको छ ।
५१ किलोमिटर दौडमा १ सय ३५, १० किलोमिटरमा २ सय र ५ किलोमिटरमा ६ सय जना विद्यार्थी सहभागी हुनेछन् । ५१ किलोमिटरतर्फ प्रथम हुनेलाई १ लाख रुपैयाँसहित स्वर्ण पदक र प्रमाणपत्र प्रदान गरिनेछ । द्वितीय र तृतीयले क्रमशः ७५ हजार र ५० हजार रुपैयाँ प्राप्त गर्नेछन भने चौथो र पाँचौँलाई जनही २० हजार रुपैयाँ दिइनेछ ।
५१ किलोमिटर विधामा प्रथम हुने महिला खेलाडिलाई अमृता कठायत -बस्नेत) का छोराछोरीले आमाको सम्झानमा प्रथम र द्धितिय हुनेलाई थप २५/२५ हजार पाउने छन् । १० किलोमिटर दौडमा १८ वर्षमुनिका बालबालिकालाई निःशुल्क सहभागिता गराइएको छ । यसतर्फ प्रथम, द्वितीय र तृतीयले क्रमशः १० हजार, ७ हजार र ५ हजार रुपैयाँ पाउने छन् । ५ किलोमिटरतर्फ प्रथमलाई ५ हजार, द्वितीयलाई ३ हजार र तृतीयलाई २ हजार रुपैयाँ पुरस्कार तोकिएको छ ।
प्रतियोगिताको उद्देश्य कर्णाली क्षेत्रको प्राकृतिक सौन्दर्य तथा साहसिक खेल पर्यटन प्रवद्र्धन गर्नु रहेको आयोजक क्लबका अध्यक्ष सरोज शाहीले बताउनु भयो । जुम्लादेखि रारा तालसम्मको दौड पुरा गर्ने खेलाडीको सम्मानमा सहभागी संख्या बराबर वृक्षारोपण गर्ने योजना समेत राखिएको छ । खेलाडिका लागि पाँच लाख रुपैयाँको इन्सोरेन्स गरिएको छ । प्रतियोगिताको तयारी अन्तिम चरणमा पुगेको छ ।
