सशस्त्र प्रहरी बल (एपीएफ) ले आसन्न निर्वाचनको सुरक्षालाई लक्षित गर्दै २३ जना वरिष्ठ उपरीक्षक (एसएसपी) लाई सोमबारदेखि देशका विभिन्न क्षेत्रमा परिचालन गर्ने निर्णय गरेको छ। निर्वाचनको समग्र सुरक्षा अवस्था प्रभावकारी बनाउन उनीहरूलाई अनुगमनको जिम्मेवारी दिइएको हो।
प्रधान कार्यालयबाट उपत्यकाबाहिर खटिने अधिकृतहरूलाई प्रत्यक्ष रूपमा र प्रदेशस्थित बाहिनी मुख्यालयबाट परिचालित हुने एसएसपीहरूलाई भर्चुअल माध्यमबाट सशस्त्र प्रहरी महानिरीक्षक (आईजी) राजु अर्यालले निर्देशन दिएका छन्।
सहायक प्रवक्ता डीएसपी शैलेन्द्र थापाका अनुसार आईजी अर्यालले निर्वाचनअगावैदेखि मतदान र मतगणनापछिसम्म उत्पन्न हुन सक्ने जुनसुकै परिस्थितिको सामना गर्न तयार रहन निर्देशन दिएका छन्। उनले उम्मेदवार, मतदान केन्द्र, मतदाता तथा मतपेटिकाको सुरक्षामा विशेष सतर्कता अपनाउन जोड दिएका छन्।
निर्वाचन अवधिभर सुरक्षासम्बन्धी सूचनाको प्रभावकारी संकलन, सबै तहका कमाण्डरसँग निरन्तर समन्वय, उम्मेदवारहरूसँग सम्पर्क तथा फिल्डमा देखिएका कमजोरीबारे तुरुन्त मुख्यालयलाई जानकारी गराउन पनि निर्देशन दिइएको छ।
सीमा क्षेत्रको निगरानी सुदृढ बनाउन, आवश्यक परेमा मानवअधिकारको पूर्ण पालना गर्दै मात्र बल प्रयोग गर्न र सो क्रममा आवश्यक प्रमाण सुरक्षित राख्न आईजी अर्यालले स्पष्ट निर्देशन दिएका छन्। निर्वाचन अवरोध गर्न खोज्ने तत्वको पहिचान गरी कानुनअनुसार कारबाही गर्न मातहतका कमाण्डरहरूलाई सजग र स्पष्ट रहन भनिएको छ।
