जुम्ला — कर्णाली स्वास्थ्य विज्ञान प्रतिष्ठान, जुम्लामा शैक्षिक सत्र २०८२ का लागि भर्ना भएका विभिन्न संकायका नयाँ विद्यार्थीहरुको स्वागत तथा अभिमुखीकरण कार्यक्रम सम्पन्न गरिएको छ।
मंगलबार आयोजित कार्यक्रममा एमबीबीएस, बीएससी नर्सिङ, बीएनसी, बीपीएच र बीफार्मा लगायतका विषयमा अध्ययनका लागि भर्ना भएका नयाँ विद्यार्थीहरुलाई औपचारिक रूपमा स्वागत गर्दै अध्ययन, अनुशासन, शैक्षिक गतिविधि तथा प्रतिष्ठानको कार्यप्रणालीबारे जानकारी गराइएको
कार्यक्रमका क्रममा प्रतिष्ठानका पदाधिकारी, संकाय प्रमुख तथा प्राध्यापकहरूले विद्यार्थीहरुलाई स्वास्थ्य शिक्षा अध्ययनका क्रममा आवश्यक पर्ने अनुशासन, व्यावसायिक आचारसंहिता तथा सेवामुखी भावनाबारे मार्गदर्शन दिएका थिए। उनीहरुले चिकित्सा तथा स्वास्थ्य शिक्षाको अध्ययन केवल डिग्री हासिल गर्ने माध्यम मात्र नभई समाजप्रति जिम्मेवारी बहन गर्ने अवसर भएको उल्लेख गरेका थिए।
अभिमुखीकरण कार्यक्रममा प्रतिष्ठानको शैक्षिक संरचना, प्रयोगशाला, अस्पताल सेवा, अनुसन्धान गतिविधि, छात्रावास व्यवस्था, पुस्तकालय सेवा तथा विभिन्न शैक्षिक अवसरबारे पनि जानकारी दिइएको थियो। साथै विद्यार्थीहरुलाई कर्णाली क्षेत्रको स्वास्थ्य अवस्थाबारे बुझ्दै यहाँका नागरिकलाई सेवा गर्ने भावनाका साथ अध्ययनमा लाग्न प्रेरित गरिएको थियो।
यस वर्ष कर्णाली स्वास्थ्य विज्ञान प्रतिष्ठानमा देशका विभिन्न जिल्लासहित विदेशबाट समेत विद्यार्थी भर्ना भएका छन्। धनुषा, धरान, कैलाली, तनहुँ, प्युठान, नवलपरासी, धादिङ, कालिकोट, कञ्चनपुर, दैलेख, मोरङ, लमजुङ, पोखरा, रुपन्देही, रौतहट, बाँके, बैतडी, सुर्खेत, महोत्तरी, अर्घाखाँची, रुकुम पश्चिम, चितवन, सिरहा, बारा, मुस्ताङ, बझाङ, कपिलवस्तु, दाङ, म्याग्दी लगायतका जिल्लाका साथै भारतबाट समेत विद्यार्थी अध्ययनका लागि भर्ना भएका छन्।
प्रतिष्ठानले कर्णालीसहित देशभरका विद्यार्थीलाई गुणस्तरीय स्वास्थ्य शिक्षा प्रदान गर्दै दक्ष स्वास्थ्य जनशक्ति उत्पादन गर्ने लक्ष्य लिएको जनाएको छ। कर्णाली क्षेत्रमै उच्चस्तरीय स्वास्थ्य शिक्षा उपलब्ध भएपछि दुर्गम क्षेत्रका विद्यार्थीलाई पनि ठूलो अवसर प्राप्त भएको प्रतिष्ठानले जनाएको छ।
