मङ्सिर १५ जुम्ला ।
खाद्य प्रविधि तथा गुण नियन्त्रण डिभिजन कार्यालय जुम्लाले कर्णाली स्वास्थ्य विज्ञान प्रतिष्ठान परिसर वरपर रहेका १४ वटा होटल तथा पसलहरूको सरसफाईको अवस्थाबारे अनुगमन गरेको छ । अनुगमन भएका मध्ये १३ वटा होटल र १ वटा खाद्य पसल रहेका छन् । प्रतिष्ठानमा उपचारका लागि आउने विरामी तथा कुरुवाहरूले स्वस्थकर खानेकुरा उपभोग गर्न पाउन भन्ने उद्देश्यले अनुगमन गरिएको कार्यालय प्रमुख प्रक्षा न्यौपानेले जानकारी दिनुभयो ।
अनुगमन टोलीमा चन्दननाथ नगरपालिका, उद्योग तथा उपभोक्ता हित संरक्षण कार्यालय, आन्तरिक राजस्व कार्यालय, उद्योग वाणिज्य संघ जुम्ला तथा अन्य सरोकारवाला निकायका प्रतिनिधिहरू सहभागी थिए । अल्पाइन, अस्मिन खाजा घर, किस्मत किराना पसल, अन्नी घर, पातारासी होटल, पोखरेली भान्सा घर लगायतका व्यवसायिक स्थलको अनुगमन गरिएको थियो । अनुगमनका क्रममा केही होटलका किचन साँघुरा रहेको र आवश्यक सरसफाईको कमी पाईएको कार्यालयले जनाएको छ ।
यस्ता व्यवसायका सञ्चालकलाई तत्काल सरसफाईमा सुधार गर्न निर्देशन सहित सुझाव दिइएको छ । साथै, होटलमा कार्यरत कर्मचारीलाई अनिवार्यरूपमा मास्क र एप्रोन प्रयोग गर्न तथा किचनभित्र खाना नखान अनुगमन टोलीले आग्रह गरेको छ । पातारासी होटल दर्ता बिना सञ्चालनमा रहेको पाइएकाले एक हप्ताभित्र दर्ता प्रक्रियामा अघि बढ्न आन्तरिक राजस्व कार्यालयले निर्देशन दिएको छ । तोकिएको समयभित्र दर्ता नगरिए कानुन बमोजिम कारबाही हुने चेतावनी दिइएको छ ।
विरामी तथा उनीहरूको हेरचाहका लागि आउने व्यक्तिले सुरक्षित र स्वच्छ खानेकुरा प्राप्त गर्न सकुन भन्ने उद्देश्यले अनुगमन गरिएको डिभिजन कार्यालयले जुम्लाका प्रमुख न्यौपानेको भनाइ छ । अनुगमनका क्रममा कुल ४ हजार ५ सय २५ रुपैयाँ बराबरका म्याद गुज्रिएका खाद्य सामग्री बरामद गरिएको डिभिजन कार्यालय जुम्लाका सूचना अधिकारी सुवास तिमिल्सिनाले जानकारी दिनुभयो । उहाँले म्याद गुज्रिएको सामान तत्काल हटाउन तथा म्यादभित्रका खाद्य वस्तु मात्र बिक्री गर्न सम्बन्धित खाद्य पसललाई सुझाव दिईएको बताउनु भयो ।
होटलतर्फ अनुगमन गर्दा तेलको गुणस्तर परीक्षणमा सबै होटलको तेल सामान्य अवस्थामा भेटिएको उहाँको भनाइ छ । तर, धेरैजसो होटलमा सरसफाईको कमी देखिएको र भान्सा कोठा नियमित सफा गर्न तथा खाना पकाउने र ओसार पसार गर्ने कर्मचारीले खाद्य स्वच्छता मापदण्ड अपनाउन अनुगमन टोलीले निर्देशन दिएको छ ।
