जुम्ला । जुम्लामा पछिल्लो समय फुटबलप्रतिको आकर्षण तीव्र गतिमा बढ्दै गएको छ। अहिले गाउँका बालबालिकादेखि सहरका युवासम्म फुटबलप्रेमी बनेका छन्। बिहान सबेरै विद्यालय जाने विद्यार्थीहरू बेलुका विद्यालय सकेर फुटबल मैदानतर्फ दौडिन्छन् भने बृद्धहरूले पनि खेल हेर्न उत्साहका साथ मैदान पुग्ने गरेका छन्।
हिउँदको ठण्डा मौसम होस् वा गर्मीको बेलुका, खेलमैदानमा युवाहरूको भिड देख्न सकिन्छ। स्थानीय विद्यालय, युवा क्लब र खेलप्रेमी समूहहरूले फुटबललाई व्यवस्थित बनाउन विभिन्न प्रयास गर्दै आएका छन्। गाउँ–गाउँमा हुने मैत्रीपूर्ण खेल र अन्तर–विद्यालय प्रतियोगिताले नयाँ खेलाडीहरूलाई आफ्नो प्रतिभा देखाउने अवसर प्रदान गरेको छ।
जिल्ला मुख्यालय खलंगादेखि तातोपानी र हिमा गाउँपालिकासम्म र गाउँहरूमा फुटबल प्रतियोगिता आयोजना हुँदै आएका छन्। विशेषगरी तिहार, असार र माघ महिनामा आयोजना हुने ‘जुम्ला गोल्डकप’, ‘तातोपानी कप’, ‘हिमा कप’ र ‘गुठिचौर कप’ स्थानीय स्तरमै सबैभन्दा चर्चित प्रतियोगिता बनेका छन्। यी प्रतियोगिताहरूले जिल्लाभरका युवाहरूलाई एक ठाउँमा ल्याउने मात्र होइन, खेलकुदमै भविष्य बनाउने प्रेरणासमेत दिएका छन्।
जुम्ला स्पोर्ट्स डेभलपमेन्ट कमिटीका संयोजक दिलबहादुर शाहीका अनुसार, पछिल्लो केही वर्षमा जुम्लामा फुटबल खेल्ने युवाको संख्या दोब्बरले बढेको छ। उनका शब्दमा, “पहिले खेल्नेहरू मनोरञ्जनका लागि मात्रै मैदान आउँथे, अहिले त धेरै युवाले फुटबललाई भविष्यको पेसा बनाउन थालेका छन्।”
खेलप्रेमीहरूका अनुसार, जुम्लामा अहिले महिला फुटबलको अभ्यास पनि बढ्दै गएको छ। विद्यालय स्तरमै महिला टोली गठन हुने क्रम सुरु भएको छ, जसले खेलकुदमा लैङ्गिक समानताको सन्देश दिएको छ।
फुटबलमैदानको पूर्वाधार भने अझै पनि न्यून छ। खलंगाको त्रिभुवन उच्च मावि खेलमैदान, पातारासी र तातोपानीका सामुदायिक मैदानहरूमा प्रतियोगिता हुने गरे पनि मापदण्डअनुसारका खेलमैदानको आवश्यकता रहेको स्थानीयहरू बताउँछन्।
जुम्लाका युवा खेलाडी तेजबहादुर रोक्का भन्छन्, “अहिले मैदान र उपकरणको अभाव छ, तर उत्साह र आत्मबलले हामी कहिल्यै पछि हट्दैनौँ। हाम्रो सपना एक दिन राष्ट्रिय टोलीमा जुम्लाको नाम लेख्ने हो।”
