रुपन्देही कारागारमा थुनामा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले बैंक जमानतसम्बन्धी निवेदन जिल्ला अदालत रुपन्देहीमा दिइसकेका छन्। उक्त निवेदनमाथि आज न्यायाधीश नारायण सापकोटाको इजलासमा सुनुवाइ हुने निर्णय भएको छ।
लामिछानेले बुटवलस्थित सुप्रिम सहकारी ठगी मुद्दामा उच्च अदालत तुलसीपुरको बुटवल इजलासले चैत २२ गते उनलाई थुनामा पठाउन आदेश दिएपछि २५ चैतदेखि पुर्पक्षका लागि भैरहवा कारागारमा छन्। यसअघि उनी जिल्ला अदालत रुपन्देहीबाट १ करोड रुपैयाँ धरौटीमा रिहा भएका थिए।
तर अहिले लामिछानेले आफ्नो धरौटी बराबरको बैंक जमानत लिएर पुनः रिहाइको माग गर्दै साउन १९ गते निवेदन दिएका छन्। निवेदनमा उनले मुलुकी फौजदारी कार्यविधि, २०७४ को दफा ६८ अनुसार बैंक जमानत लिई र दफा ७१ को आधारमा थुनामुक्त हुने आदेश दिन अदालत समक्ष आग्रह गरेका छन्। दफा ६८ मा अभियुक्तलाई धरौटी वा बैंक जमानतमा रिहा गर्न सकिने व्यवस्था गरिएको छ भने दफा ७१ ले कारबाहीको कुनै पनि अवस्थाको विषयमा थुनामा वा जमानतमा राख्न सकिने स्पष्ट पार्दछ।
निवेदनमाथि आजको सुनुवाइले लामिछानेको रिहाइको सम्भावना तय गर्ने भएकाले अदालतको निर्णयप्रति सबैको ध्यान केन्द्रित भएको छ।
