भदौ १३ जुम्ला
कर्णाली राजमार्गको विभिन्न खण्डमा कतै पहिरो र कतै सडक भासिदा पुनः अवरुद्ध भएको छ । राजमार्ग अन्तर्गत कालिकोट जिल्लाको विभिन्न खण्डामा पहिरो आउँदा र सडक भासिदा अवरुद्ध भएको हो । अविरल वर्षाले पहिरो खस्दा र सडक भासिदा कर्णाली राजमार्गमा यातायात सञ्चालन रोकिएका छन् ।
सुर्खेत–जुम्ला सडक अन्तर्गत कालीकोटको खाँडाचक्र नगरपालिका–२ कालेखोला, एसमोड, गगने खोलामा सडक भत्किँदा सवारी आवागमन अवरुद्ध भएको हो । कालेखोलामा सडक भासिएको छभने गगने खोला र एसमोड लगायतका ठाउँमा पहिरो खसेको छ ।
पहिरो खस्दा राजमार्ग अवरुद्ध भएको कालीकोटका प्रहरी प्रमुख टेकबहादुर रावतले जानकारी दिनुभयो । उहाँले हुल्मदेखि दहीखोलामा पहिरो खसेको खबर आएको बताउनु भयो । अहिले पहिरो पन्छाउने काम भइरहेको छ । वर्षाले कर्णाली राजमार्ग अन्तर्गत कालीकोट खण्डको दहीखोला, गगनेखोला, एसमोड र हुल्ममा बारम्बार पहिरो जाने गरेको छ ।
