वैशाख २३ जुम्ला
वैशाख २२ जुम्ला । जुम्लाको हिमा गाउँपालिका–२ ओदीमा १६ औँ जिल्ला स्तरीय राष्ट्रपति रनिङ शिल्ड प्रतियोगिता मंगलबारबाट सुरु भएको छ । प्रतियोगिताको उद्घाटन गर्दै कर्णाली प्रदेशका सामाजिक विकास मन्त्री धनश्याम भण्डारीले कर्णाली प्रदेश खेलकुद क्षेत्रमा देशलाई नेतृत्व गर्न सक्ने बताउनु भयो । उहाँका अनुसार विद्यालय स्तरबाटै सक्षम र दक्ष खेलाडी उत्पादन हुने भएकाले यस्ता प्रतियोगिताले प्रतिभा पहिचानमा महत्वपूर्ण भूमिका खेल्छन् ।
विकट क्षेत्र हिमा गाउँपालिकामा आयोजना गरिएको यस कार्यक्रमले कर्णालीमा सकारात्मक सन्देश प्रवाह गरेको उहाँको भनाइ थियो । कार्यक्रममा हिमा गाउँपालिका अध्यक्ष लक्ष्मण बहादुर शाहीले सिँजा क्षेत्र सांस्कृतिक राजधानी बन्न सक्ने सम्भावना रहेको उल्लेख गर्नुभयो । नेपाली भाषाको उत्पत्तिसँग जोडिएको ऐतिहासिक स्थलमा आयोजना गरिएको राष्ट्रपति रनिङ शिल्ड प्रतियोगिताले खेलकुदको महत्व अझ व्यापक रूपमा फैलाउने विश्वास व्यक्त गर्नुभयो ।
प्रतियोगिताको उद्घाटन सत्र अन्तर्गत मंगलबार भएको १५ सय मिटर दौडमा छात्रतर्फ चन्दननाथ माध्यमिक विद्यालयका युवकराज बुढा प्रथम, कनकासुन्दरी गाउँपालिकाका वीर बहादुर बुढा द्वितीय र हिमा गाउँपालिकाका हिमाल अधिकारी तृतीय हुनु भएको छ । छात्रातर्फ हिमा गाउँपालिकाकी संगिता बुढा प्रथम, स्वतिका बुढा द्वितीय र सिँजा गाउँपालिकाकी सुस्मा चौलागाईं तृतीय हुनु भएको छ । सटपुट तर्फ छात्रतर्फ पातारासी गाउँपालिकाका हेमन्त बुढा प्रथम, कनकासुन्दरीका सुवास बुढा द्वितीय र तातोपानी गाउँपालिकाका नरेन्द्र शाही तृतीय हुनु भएको छ ।
छात्रातर्फ सिँजा गाउँपालिकाकी गंगा सार्की प्रथम, सपना रोकाया द्वितीय र हिमा गाउँपालिकाकी कमला शाही तृतीय हुनु भएको हो । कबड्डी छात्रातर्फ हिमा र कनकासुन्दरी गाउँपालिकाबीच भएको खेलमा कनकासुन्दरी विजयी भयो भने सिँजा र तिला गाउँपालिकाबीच भएको खेलमा सिँजा विजयी भएको छ । जुम्लाका आठ स्थानीय तह मध्ये सातवटा स्थानीय तहको प्रतियोगितामा सहभागिता रहेको हिमा गाउँपालिका युवा विकास समितिका उपाध्यक्ष धिरेन्द्र रोकायाले जानकारी दिनुभयो ।
